O vindouro 27 de Abril, o Doutor em literatura brasileira pola Universidade de São Paulo, Ulisses Infante, falará sobre A canção brasileira: dos ecos da Galiza aos retratos do país.
Ulisses Infante é autor de umha importante obra de livros didácticos para o estudo da nossa língua com grande reconhecimento nos diversos ámbitos da cultura lusófona. Entre os seus títulos podemos salientar: Curso de gramática aplicada aos textos, Curso de literatura de língua portuguesa, Do texto ao texto: leitura e produção de textos, Textos: leituras e escritas e Interpretação da poesia, Fernando Pessoa, entre outros.
Actualmente é Professor-leitor de Língua portuguesa, cultura e literatura do Brasil na Universidade da capital da Galiza.
O acto dará começo às 8 do serám na Fundaçom Caixa Galiza, sediada no Cantom Grande da cidade herculina, local onde a decana das associaçons culturais da Galiza soe desenvolver este tipo de eventos.
O Facho, ao igual que dúzias de associaçons culturais da Galiza, esborralham com actos como este as insultantes declaraçons do Conselheiro da cultura do governo autónomo galego, quem saíra à arena para afirmar, sem papas na língua, que a cultura nacional galega limitava. Porém, os factos mais umha vez ultrapassam as palavras do conselheiro, demonstrando que , na realidade, o que limita é a fronteira administrativa que Espanha impom à naçom galega. A nossa cultura e a nossa língua, para desgraça do infeliz conselheiro, tenhem vocaçom internacional.