Pouco depois das 20 horas o corpo de bombeiros da cidade transmite  NÓS-UP que vem de receber comunicaçom da Polícia local informando que a nossa cacharela na praça do Matadeiro vinha de ser “anulada” polo Governo Municipal do PP.

Similar comunicaçom recebeu a Associaçom Cultural Henriqueta Outeiro respeito a sua cacharela na praça da Peixaria Velha.

Tal como comunicamos ao corpo de bombeiros, tinhamos autorizaçom municipal e cumpriamos com todos os requisitos da normativa, e que portanto nom iamos ceder às pressons da extrema-direita local suspendendo a nossa cacharela, pois a rua é do povo, nom do PP, e as festas populares som do povo, nom de Ángel Currás!

A firmeza mantida, a denúncia imediata lançada polas redes sociais, e as gestons realizadas com representantes públicos, fôrom determinantes para finalmente frear umha nova medida fascista do PP.

NÓS-UP quer agradecer o BNG de Compostela as gestons realizadas com o Concelho, que sem lugar a dúvidas contribuírom a gorar a repressom. Obrigado pois a Lucia Vázquez, Rubén Cela e Goretti Sanmartín pola sua solidariedade.

Milhares de vizinhas e vizinhos inundárom praça do Matadeiro

Como bem sendo habitual a XIII ediçom da cacharela da Unidade Popular foi das mais concorridas da cidade. Milhares de pessoas participárom na celebraçom do solstício de verao organizada pola esquerda independentista e socialista, amenizadas pola magnífica música tradicional galega, pam com chouriço de graça, e o lume “purificador”, que sem lugar a dúvidas contribuírom a realçar a mágia dessa noite.

Agradecimentos

Umha vez mais agradecemos aos trinta negócios que colaborárom um ano mais connosco em fazer possível a cacharela de NÓS-UP, assim como à vizinhança da praça do Matadeiro por ter cedido gratuitamente a luz que o governo do PP nos denegou. A todos eles muito obrigados!