O Museu Municipal acolhe a exposiçom Ciência da gaita, Consciencia da sanfona, que se complementará o vindouro dia 26 com um concerto de sanfona, onde participarám mais de vinte sanfonistas, e com um congresso sobre estas questons que terá lugar os dias 11 e 12 de Março com a participaçam de 14 especialistas na música galega.

Assim, a cidade das Burgas rende merecida homenagem desde esta segunda-feira a unha das figuras referenciais da história da música popular galega, Faustino Santalices.

O gaiteiro, sanfonista e musicólogo Faustino Santalices Peres finado no 1960, é o protagonista absoluto de um ambicioso projeto divulgativo que recupera para o público o legado deste personagem fundamental da cultura galega, vinculado aos instrumentos da gaita e a sanfona, dos que  foi artesao e intérprete virtuoso.

Ao longo do ato de apresentaçom lembrou-se a figura de Santalices como um dos grandes da cultura galega, polo esforço dedicaçom e paixom que pujo nom só por recolher a música popular senom por construir instrumentos que a figessem reprodutível.

Um dos estudiosos de Santalices, Cástor Castro, defendeu a importancia divulgativa deste trabalho já que “resta muito por investigar na cultura e o património imaterial galego, con esta homenagem a Santalices escrevemos um capítulo importante, afondando numha pessoa que flutua no subconsciente do povo galego como referente musical”.

Entre outras curiosidades Castro lembrou que Santalices foi embaixador do toque fechado na gaita, à maneira própria de tocar este instrumento na zona ocidental da geografia galega, umha técnica que hoje só mantenhem quatro gaiteiros na nossa naçom.

Aliás, na apresentaçom informou-se de que as actividades programadas em Ourense se repartirám entre o Auditório e o Museu Municipal da Cidade. O Museu, que acolhe desde este 21 de Fevereiro a exposiçom itinerante, mostra Santalices através de fotografias, vídeos testemunhais e documentos, percorrendo a sua biografia e o seu trabalho pola dignificaçom da cultura musical da Galiza. A mostra foi acolhida com anterioridade polo Museo Etnológico de Riba d'Ávia.