A iniciativa fai parte de um plano orientado à formaçom integral da militáncia, quadros e dirigência do nosso partido, mas também aberto ao apoio a outros coletivos interessados na autoformaçom revolucionária e galega.
Com o marxismo como eixo vertebrador da atividade, a Escola Nacional de Quadros Comunistas Moncho Reboiras carece de qualquer vocaçom académica, elitista ou erudita. Com modéstia e protagonismo das próprias pessoas no seu processo formativo, abordaremos o estudo e a aprendizagem em termos ativos, colaborativos e críticos, sem qualquer assunçom de "critérios de autoridade" indiscutíveis.
Partimos de umha das principais dicas do próprio Karl Marx, quando ele afirmou e praticou a necessidade de ser crítico/a com todo, sem exceçons.
Com afám científico e recusando-nos a qualquer parcelamento das ciências sociais, tentaremos integrá-las numha totalidade que configura o princípio fundamental para a compreensom e transformaçom da realidade numha perspetiva revolucionária comunista.
Desde já, começamos a partir do zero e avançamos na recuperaçom e socializaçom do pensamento revolucionário fundado por Karl Marx e Friederich Engels, cuja vigência se mantém e afirma com mais força com cada nova crise das que ciclicamente golpeiam o modo de produçom capitalista.
Achamos necessário dotar a militáncia revolucionária e, em geral, os setores mais avançados do nosso povo, dessa ferramenta invencível que é a autoconsciência crítica e de classe, através do mais avançado sistema de análise e pensamento para a açom anticapitalista.
Concebemos o marxismo como sistema baseado na obra de Karl Marx e do seu camarada Friederich Engels, mas também nos contributos realizados por numerosos autores e autoras a partir daí, a par e passo das transformaçons e acontecimentos operados no próprio andamento do capitalismo até hoje.
Tencionamos estudar individual e coletivamente para compartilhar e estender o conhecimento, como valor de uso que vai dotar-nos da mais importante ferramenta transformadora ao serviço da praxe revolucionária. Tentaremos oferecer versons simplificadas e claras, mas nom vulgarizadoras, das diferentes categorias marxistas, das mais acertadas análises e experiências que estám a ser feitas em diferentes pontos do planeta, avançando no conhecimento do pensamento revolucionário do nosso tempo como totalidade ao serviço da revoluçom galega e mundial.
Ao anterior, devemos acrescentar a necessidade do autoconhecimento nacional que como galegos e galegas nos corresponde protagonizar. A história, a língua, a composiçom e evoluçom da nossa formaçom social em torno da luita de classes como verdadeiro motor. Um património oculto, negado e manipulado polo poder espanhol, que tenta reduzir-nos a um território anexo do seu projeto sub-imperialista, convencendo-nos da nossa suposta incapacidade de autorrealizaçom como comunidade nacional.
A formaçom ao serviço da superaçom do patriarcado será outra das vertentes do trabalho da Escola. O conhecimento da trajetória histórica da mulher na Galiza e no mundo, das suas luitas e das mais avançadas teorizaçons do pensamento revolucionário feminista.
Cursos, seminários, elaboraçom de textos divulgativos e formativos, reproduçom doutros já disponíveis noutros idiomas, que tentaremos disponibilizar para o nosso povo trabalhador na nossa língua.... Recorreremos para isso a iniciativas presenciais, mas também a distáncia, mediante a aplicaçom das ferramentas tecnológicas de que pudermos dispor e da procura existente em cada momento.
É muito o trabalho por fazer. Ficamos desde já a dispor das nossas leitoras e leitores, de todo o tipo de coletivo para maiores esclarecimentos ou sugestons sobre a seçom e sobre as atividades da própria Escola Nacional de Quadros Comunistas Moncho Reboiras, que neste momento inicia a sua trajetória nestas páginas.
