Hemorrágia Cerebral, por Glitzy queen00 - Imagem no Domínio Público

Co obxectivo de facilitar o traballo de cobertura e difusión de todos estes eventos, FEGADACE reuniu o calendario completo de actividades nun só documento que se inclúe a continuación, onde se indican as datas, entidades organizadoras e horarios de todas as convocatorias. Tanto a Federación como as súas asociacións quedan a disposición dos medios de comunicación para ampliar e/ou aclarar calquera cuestión de interese.

As asociacións de dano cerebral aproveitan estas datas para informar sobre a realidade da súa discapacidade, fomentando a inclusión social das persoas con DCA e das súas familias, e para reivindicar os seus dereitos. Visibilizando o dano cerebral tamén informan sobre as súas causas e insisten nos mecanismos de prevención existentes. É por ese motivo que FEGADACE quixo unir as convocatorias do Día do Dano Cerebral e do Día do Ictus, por ser este último a principal causa do DCA, no 78% dos casos. Non hai prevención do DCA sen prevención do ictus. Por último, estas conmemoracións serven de escaparate para aquelas familias que descoñecen a existencia das asociacións pero que precisan dos servizos de rehabilitación e de inclusión, dada a súa ausencia ou escaseza no marco do sistema público de saúde e atención á dependencia.

A maior parte dos actos organizados son mesas informativas nas que participan os equipos técnicos das asociacións, familiares e xuntas directivas, persoas usuarias e voluntariado. Xuntas aportan unha visión global do que é o movemento asociativo do dano cerebral, e poden aproximar ao público, desde diferentes perspectivas, a esta discapacidade.

As mesas informativas contan coa colaboración dos profesionais da SGN, coa que FEGADACE ten un convenio de colaboración para fomentar actividades de prevención do DCA. A Federación quere que  estes actos sirvan, ademais, de homenaxe a Miguel Blanco, neurólogo, membro da SGN, e colaborador das asociacións de dano cerebral recentemente falecido.