Así de contundente se amosaba a Secretaria Comarcal da CIG-Saúde, María Seijo, na protesta que hoxe se desenvolveu diante do Hospital da Coruña para denunciar os déficits de persoal, estruturais e organizativos das Urxencias, a falta de profesionais en distintos servizos, o incremento das listas de espera, ou peche de máis de 200 camas.
Durante a concentración, convocada pola Comisión de Centro do CHUAC, a Secretaria da CIG-Saúde da Coruña defendeu, fronte as políticas austericidas do PP, que "unha boa calidade de asistencial significa empregar todos os recursos necesarios, todos/as os/as profesionais e todos os coidados dispoñíbeis para evitar o sufrimento da poboación. E iso é o que non se está a facer. Para a Xunta, as/os doentes non son persoas senón números e resultados estatísticos".
En canto á situación do Servizo de Urxencias, referiuse á sobrecarga de traballo derivada da falta de profesionais e o amoreamento de doentes nas padiolas, mentres 200 camas permanecen pechadas. Ademais denunciou o incremento "espectacular" das listas de espera para as intervencións cirúrxicas. "O servizo de neurocirurxía permaneceu pechado todo o verán e só se practicaron as intervencións urxentes; e hai pacientes agardando por unha cita para gastroscopia dende o mes de xaneiro", alertou Seijo.
A respecto das privatizacións dos servizos da sanidade pública, a responsábel sindical rexeitou que a externalización supoña aforro ningún para a administración, senón que simplemente é un negocio para as empresas adxudicatarias e un grave deterioro para a calidade asistencial. "Ou acaso as empresas privadas son ONGs?", ironizou. "Cando dan un servizo, as empresas teñen beneficios, e téñenos porque rebaixan a calidade do servizo que prestan e porque as traballadoras e traballadores que contratan están sometidas a unhas condicións laborais inferiores, con salarios baixos e contratos lixo", criticou.
Neste senso, engadiu tamén que o peche de camas, alén dos prexuízos para os/as enfermos/as, ten un impacto directo sobre o emprego. "Hai servizos con déficits graves de persoal mentres se engordan as listas de desemprego no sector sanitario e os nosos profesionais teñen que emigrar", subliñou.
Por iso, María Seijo instou tamén as/os doentes e as súas familias a denunciar a súa situación e sumarse á reivindicación dunha sanidade pública, universal, gratuíta e de calidade.