O Fórum Galego da Imigraçom (FGI), "perante os factos acontecidos e que acontecem de maneira terrível com as pessoas refugiadas e perante as atitudes dos Governos da Uniom Europeia" acabou de chamar a umha reuniom em regime de autoconvocatória a decorrer no dia 10 de fevereiro às 19:30 h em Compostela, no Centro de Trabalho e Cultura (Rua de Sam Roque, 6 bis).
O alvo da reuniom será organizar "umha resposta social galega" que incluiria "umha potente manifestaçom nacional" na capital, para a qual proponhem como data o dia 27 deste mês embora, explicam, "pode-se avaliar outra data".
O FGI tem forma de assembleia aberta, e inclui 80 associaçons de imigrantes e entidades de caráter social, sindical e político de toda a Galiza.