Foto no Domínio Público - O racismo e a xenofobia sempre conduzirom a disparates. Na foto, os desenhos de Josiah C. Nott e George Gliddon's em 'Indigenous races of the earth' (Raças indígenas da Terra) (1857), que sugeria que as pessoas negras possuiam diferenças tanto físicas quanto inteletuais que os deixavam a metado do caminho entre pessoas brancas e macacos.

O Foro Galego de Inmigración desenvolveu unha Rolda de Prensa Informativa (ás 17:30 h ), e un Acto Público/Concentración diante da Academia Iria Flavia (Rúa Pérez Constanti nº 18) en Santiago de Compostela este xoves día 28 de Xaneiro ás 17:45h coincidindo coa celebración nesa Academia privada da Primeira, en Galicia, das Novas Probas de Cultura Española que dende o mes de outubro de 2015 se esixen para poder solicitar ás persoas estranxeiras residentes de longa duración o acceso á nacionalidade española.

Nese Acto fixeron público O POSICIONAMENTO DO FORO GALEGO DE INMIGRACIÓN EN RELACIÓN CO NOVO PROCEDEMENTO DE ACCESO Á NACIONALIDADE ESPAÑOLA E EN RELACIÓN COS INFORMES DE INTEGRACIÓN:

O NOVO PROCEDEMENTO DE ACCESO Á NACIONALIDADE ESPAÑOLA: MÁIS DISCRIMINATORIO, MÁIS CUSTOSO E PRIVATIZADOR

O novo procedemento de acceso á nacionalidade española, que establece a nova Lei de Rexistro Civil que entrou en vigor o pasado mes de outubro, implica engadir as xa duras e difíciles condicións que establecía a anterior Lexislación as seguintes:

-       Unhas taxas administrativas de 100 Euros, novidade que evidentemente non pode ter máis que afán recadador e que afecta a un dos colectivos máis penalizados pola dura Crise Económica que aínda sufrimos.

-       A realización para todas as persoas que o soliciten dunha proba de cultura española obrigatoria, que é fondamente discriminatoria xa que as persoas migrantes que solicitan á nacionalidade precisan xa un tempo de estancia regular amplo, e non se esixe para as persoas nacidas en territorio español que teñen esa nacionalidade. Esa proba, dependente do Instituto Cervantes, que convenia con entidades privadas á realización da mesma ao longo do territorio español ademais:

-       Esixe un novo desembolso económico (85 Euros)

-       Precisa dun procedemento dixital de inscrición, claramente non accesible para todas as persoas interesadas.

-       Esixe en moitos casos un desprazamento importante, xa que en Galicia, só unha Academia privada situada en Santiago de Compostela desenvolve esta proba.

-        É unha proba única e simultánea (como se falaramos dun proceso de oposición pública), mensual (o último xoves de cada mes, ás 18:00 h, excepto os meses de decembro e agosto) e con prazas limitadas, o que supón un problema importante xa que debe harmonizarse con outras documentacións imprescindibles no proceso, como os certificados de penais que teñen caducidade temporal.

-       É unha proba difícil, tendo en conta que podemos falar de persoas maiores, con escasa formación previa, etc. É imprescindible aprobala, non basta con presentarse á mesma.

-       Abre camiño a un proceso privatizador lamentable, xa que é unha Academia privada, no caso de Galicia, a que se beneficia deste requisito. Esa Academia de forma absolutamente inmoral ofrece un curso preparatorio bastante custoso previo á mesma. Obviando a posibilidade de que foran entidades públicas, os concellos por exemplo, as que de forma gratuíta desenvolveran a mesma.

-       Implica para as persoas que o soliciten que non tiveran como lingua materna o español, tamén de forma obrigatoria, a acreditación dun nivel de coñecemento da lingua española equivalente o A2. Isto supón unha segunda e tremenda discriminación para o colectivo de migrantes que non proceden orixinariamente de Latinoamérica. Na práctica supón a necesidade de obter esta acreditación en entidades públicas ou privadas habilitadas para esta actividade. Supón novos gastos (140 Euros de matrícula) e novas dificultades para persoas non necesariamente acostumadas a estudar e ás que se lles esixe un nivel de coñecemento da lingua española que non se lle esixe as persoas que teñen esa nacionalidade por nacemento.

-       O conxunto do proceso de obtención da nacionalidade suporía un custo mínimo no entorno dos 325 Euros por persoa, sen contar os desprazamentos, superando esta tremenda carreira de obstáculos no primeiro intento.

OS INFORMES DE INTEGRACIÓN: DISCRIMINATORIOS, DE MOI DUBIDOSA EFICACIA, E TAMÉN CUSTOSOS EN TEMPO

A Xunta de Galicia no DOG do 10 de decembro de 2015, estableceu a normativa para o desenvolvemento no ámbito da nosa Comunidade Autónoma destes Informes que recolle a Lexislación estatal de Estranxeiría. Os Informes son unha documentación non obrigatoria que a persoa estranxeira pode incluír na súa renovación de autorización de residencia e traballo, e que poden substituír o cumprimento doutros requisitos da Renovación.

-       En primeiro lugar a mera esixencia de xustificación de “integración”, concepto tan discutible, supón unha lamentable discriminación e unha forma máis de racismo institucional que establece o Estado Español en colaboración aquí coa Xunta de Galicia.

-       En segundo lugar o carácter totalmente discrecional do “poden substituír”, non garante que a aportación do mesmo permita obter a renovación solicitada. Se existen eses informes, alomenos o Ministerio do Interior debe establecer normativamente que substitúen o cumprimento doutros requisitos e garantir polo tanto a obtención da Renovación solicitada ás persoas que os aporten.

-       Atopámonos ademais na regulamentación galega, cun cursiño moi longo, de 40 horas, para obter eses Informes de Integración, impartido por ONGs, o que supón gastos, desprazamentos, esixencia de estudos para persoas non necesariamente acostumadas, etc. Unha discriminación e unha dificultade importante, de novo para moitas persoas.

"ESTAMOS A FALAR DE NOVAS MEDIDAS FONDAMENTE DISCRIMINATORIAS, CUSTOSAS, DIFÍCILES, QUE ESIXEN DESPRAZAMENTOS (UNHA PROBA SÓ PODE FACERSE NA MENCIONADA ACADEMIA DE COMPOSTELA E A OUTRA-A DO IDIOMA- EN VIGO), E QUE INTRODUCEN LAMENTABLEMENTE MECANISMOS PRIVATIZADORES NO PROCESO" - denuncian do FGI.

Fixeron públicas tamén AS ESIXENCIAS QUE COMO FORO GALEGO DE INMIGRACIÓN PRESENTARON DIANTE DESTES CAMBIOS NORMATIVOS:

1.- Eliminación das dúas novas probas obrigatorias no proceso de acceso á nacionalidade española e das taxas administrativas novas incorporadas ao proceso, antes gratuíto.

2.- Mentres isto non sucede, alomenos establecemento de convenios con entidades públicas, os concellos fundamentalmente, para a realización de probas sinxelas e adaptadas á formación e traxectoria das persoas examinadas. Garantía do carácter gratuíto das mesmas e da posibilidade realizalas nos concellos de residencia. Debe impedirse que empresas privadas se beneficien, e de que maneira, da realización destas probas.

3.- Eliminación por fondamente discriminatorios dos chamados “Informes de Integración”. Substitución dos mesmos por outros mecanismos que flexibilicen o proceso de renovación das autorizacións das persoas sen ter que acudir a este modelo racista.

4.- Mentres o anterior non sucede, garantía de utilidade clara dos citados Informes nos procesos de renovación das autorizacións. Simplificación e adecuación dos mesmos á formación e traxectoria das persoas interesadas. Nese sentido un curso moito máis curto e que poida impartirse nun só día, debía ser suficiente.