Con esta sinopse, AMARANTE Setem e a Campaña Roupa Limpa queren presentaro seu documental “Fíos Fora, historias de obreiras, entre costuras e patróns”, que dende as conversas de moitas persoas protagonistas narra o que foi o sector do téxtil galego dende seus nacementos ata a súa deslocalización e o impacto deste modelo industrial.
Illa Bufarda foi a produtora creativa encargada de levar a cabo esta longametraxe documental diversa en voces e protagonistas, onde participaron ex traballadoras do téxtil en Galicia, personaxes vencellados ó sector empresarial e aos talleres e traballadoras do téxtil en Marrocos, entre outras moitas.
Este documental, que estará dispoñible en galego, castelán e inglés queren que sexa unha porta aberta ao debate. Fálase moito dos grandes beneficios desta industria pero pouco dos milleiros de traballadoras que o fan posible e en que condicións o fan.
Realizarán a súa estrea Internacional en A Coruña, cidade e provincia con gran referencia no sector industrial e outra en Pontevedra, sede da organización.
O documental estará presente en varios festivais cinematográficos e está previsto realizar máis proxeccións ó longo do territorio galego, noutras cidades do estado español e a nivel internacional.
A continuación a axenda das datas e programación prevista para o mes de novembro que continuará nos vindeiros meses por máis cidades e vilas.
Estrea Internacional na Coruña:
Centro do Auditorio Ágora: Xoves 12 de Novembro ás 19:45h
Actuación de Mónica Nut, proxección de Fíos Fóra e coloquio aberto coas traballadoras protagonistas, Amarante e Illa Bufarda.
Segunda Estrea en Pontevedra:
Teatro Principal: Venres 13 de Novembro ás 20:00
Proxección de Fíos Fóra e coloquio aberto coas traballadoras protagonistas, Amarante e Illa Bufarda.
En canto aos festivais, presentase nos seguintes:
Cine Europa en Santiago (con datas pendentes de confirmación)
OUFF-Ourense Film Festival: Mércores 18 de Novembro ás 20:30h.
Nestes enlaces podedes consultar toda información sobre o documental:
Páxina Facebook Oficial Fíos Fóra
O documental culmina un proxecto de 3 anos adicado a formación e sensibilización sobre a feminización da pobreza no sector téxtil, a denuncia sobre as condicións de explotación das traballadoras e as alternativas para un consumo responsable de roupa. Este traballo foi financiado pola Subdirección Xeral de Cooperación Exterior da Xunta de Galicia e a UE.
Amarante Setem é unha asociación galega que traballa no eido da educación, o consumo responsable e a economía social. Fai campañas de sensibilización e incidencia política e forma parte da Rede Internacional Roupa Limpa dende hai 10 anos.
Roupa Limpa é unha rede internacional presente en 16 países europeos que traballa en rede con 200 organizacións para dar voz as traballadoras da confección global e mellorar as súas condicións laborais e de vida.
Illa Bufarda é unha produtora integrada por dúas profesionais do sector audiovisual, Sabela Iglesias e Adriana P.Villanueva. Dende o ano 2012 traballan como proxecto cultural sensible e comprometido coa promoción e a divulgación da cultura dende un eido ben definido: a linguaxe audiovisual.