Nesta situación de emerxencia, onde perigaron non so medios forestais senón tamén casas e vidas humanas en moitos lugares de Galicia, atopámonos con que a Consellería segue a actuar do mesmo xeito ano tras ano, dando declaracións a prensa de datos ficticios dos efectivos cos que realmente conta, xa que, os datos de persoal que aparecen no PLADIGA 2015 para nada son un reflexo da realidade existente no monte.
Os traballadores viñan advertindo dende había tempo o abandono total que se está producindo no Servizo Público de extinción de incendios forestais da Xunta de Galicia, por parte dos dirixentes da Consellería de Medio Rural e do Mar: multitude de prazas vacantes nos 19 distritos sen cubrir por aforrar cartos, material técnico e mecánico obsoleto e disgregación do dispositivo público en multitude de empresas que orixinan descoordinación. "Basta xa, de aludir á climatoloxía e aos incendiarios para ocultar o absoluto fracaso na xestión da actual Conselleira e do seu Secretario Xeral na loita contra os lumes, xestión unicamente baseada na propaganda, os recortes e as mentiras", din.
É por esta inaptitude manifesta, polo que, dende as Organizacións Sindicais CCOO, CIG, CSI-F e UGT peden a dimisión inmediata do Secretario Xeral de Medio Rural e Montes e da propia Conselleira. Asemade esixen a apertura inmediata dunha mesa de diálogo onde abordar os problemas que asolan o Servizo Público de extinción de incendios forestais.