Queren recordar que ata o de agora acumulan 15,145 euros en multas. As que pagaron entre todas ascenden a 4,827 euros, e o monto restante seguirá sendo utilizado para as sancións futuras, xa que seguiremos loitando polo dereito á vivenda e levando a cabo accións de denuncia. En 2014 lanzaron unha campaña de socialización de multas que rematou a principios deste ano 2015 e que lles deixou un bo sabor de boca ao saber que contan co apoio e a solidariedade de milleiros de persoas.
A boa noticia son as 15 persoas absoltas (dun total de 16) que se viron obrigadas a participar en diferentes procesos xudiciais polo penal. Pola contra, nos xuízos pola vía administrativa en resposta ás sancións impostas, perdemos 4 e gañamos 5. Non obstante, seguen a chegar novas multas de distintas accións. Por exemplo, as relativas á convocatoria feita a nivel nacional contra a Lei Mordaza na que sufriron a represión e a violencia policial.
"Este ano non deixamos de apoiar á veciñanza de Elviña na súa loita por manter as súas vivendas fronte ó proceso especulativo do parque Ofimático. Seguimos acompañándoos todos os venres nas súas protestas na pasarela, participamos no seu Entroido, na súa Revolución do Toxo e máis acudimos a Elviña para lembrar o cabodano do desafiuzamento e destrución da casa de Varo e Isabel, e seguiremos apoiando a loita da veciñanza ata acadar unha solución xusta" - explican.
Teñen tamén un agarimoso recordo para Carlos Midón e a súa familia, vítima de estafa e desafiuzamento, compañeiro de loita polo dereito á vivenda en Compostela, e que no cabodano do seu desafiuzamento quitouse a vida ante a desesperación de non poder resolver a situación de miseria á que o abocaron xunto coa súa familia. Uns días despois as plataformas convocaron unha manifestación á súa memoria, reivindicando que estes feitos son crimes sociais e teñen responsables.
Pola banda de SDC, queren rachar coa soidade e o illamento, e continuan a realizar asembleas de persoas afectadas nas que traballan conxuntamente para buscar solucións e xerar dinámicas de asesoramento colectivo e apoio mutuo entre todas. Deste xeito, querenasentar as bases para que o dereito á vivenda sexa un eixo sobre o que construír unha sociedade xusta na que ninguén máis teña que sufrir o medo a quedar na rúa.
Por todo o anterior, queren "mandar unha mensaxe de esperanza e de loita a todas aquelas persoas que están en risco de desafiuzamento ou teñen problemas habitacionais. Nós seguiremos loitando por este dereito e contra a represión. Agardamos que no 2016 consigamos rematar cos desafiuzamentos e o dereito a unha vida digna para todas sexa cada día máis unha realidade".