Indica David Soto Díaz no escrito que, no cadro do seu trabalho rutineiro de seguimento das actuacións dos diferentes Corpos e Forzas de Seguranza do Estado, EsCULcA observou que na memoria da P.L. da Coruña referida ás actuación de 2013 constan tramitados 19 expedientes sancionadores por manipulación de colectores de lixo . Tamén soubo, por noticias aparecidas en varios medios de comunicación, que en abril de 2014 a P.L. da Coruña denunciara outras sete persoas polos mesmos motivos.
O representante de EsCULca subliña que o observatorio entende que subsumir a busca de comida en colectores de lixo como infracción no incumprimento da prohibición do art. 12 da Ordenanza de Residuos e Limpeza supón unha desnecesaria criminalización da pobreza e exclusión social e afasta a aplicación da norma da finalidade para a que foi prevista (a protección do medio ambiente e a limpeza) introducindo finalidades ou motivacións de control policial de grupos concretos de persoas como se pon de manifesto en declaracións recollidas polos medios de fontes da P.L. e mostra a elevada porcentaxe de persoas de nacionalidade romena afectadas por esta medida.
En opinión de EsCULcA, a aplicación da Ordenanza de Limpeza determina violación de dereitos consagrados no Título I da CE de 1978, en concreto o dereito á dignidade da persoa, á integridade moral e o dereito á non discriminación, polo que xa no seu día formulou queixa perante o Valedor do Pobo e a propia administración local.
Finalmente, solicita David Soto sexa admitido a trámite o escrito e se comunique se o novo Goberno municipal presidido por don Xulio Ferreiro Bahamonde ten pensado derogar a referida disposición (art. 112.3.c) ou modificala, e, neste último caso, informe en que sentido.
Ver aquí o escrito.