Co inicio do novo ano os sindicatos CIG, CCOO e UGT retoman as mobilizacións para reclamarlle ao Goberno español a concesión do indulto a Carlos Rivas e Serafín Rodríguez, os dous traballadores condenados a prisión por participar nun piquete informativo durante unha folga. As protestas comezan este xoves día 15 diante do Marco de Vigo ás 20.00 horas.
Dende a CIG, CCOO e UGT lembran que logo da sentenza inxusta que os condenou a tres anos de cárcere por faceren parte dun piquete informativo durante unha folga legal na demanda dun convenio colectivo xusto para o sector do transporte, Carlos e Serafín fican á espera de que o Goberno español lles conceda o indulto.
"O Executivo presidido por Mariano Rajoy xa llelo denegou nun primeiro intento, polo que é fundamental seguirmos a reclamar na rúa que se lles conceda o indulto para evitarmos que dous traballadores acaben en prisión por defenderen os dereitos da nosa clase", sosteñen.
Neste senso, apostan por continuar coa presión social sobre o novo ministro de Xustiza, Rafael Catalá, e o propio presidente do Goberno central para que resolvan dunha vez e de maneira afirmativa a solicitude de Carlos e Serafín "e poñan fin ao sufrimento innecesario que padecen eles e as súas familias ante esta cruel incerteza".
Finalmente, ademais de chamar á veciñanza a participar na protesta, solicitan colaboración para difundir a convocatoria. "Porque hoxe son eles, mais mañá podes ser ti a vítima dunha Xustiza que deixa impunes os verdadeiros delincuentes (poderosos/as, corruptos/as, banqueiros/as...) e ao tempo afoga, con represión, ao pobo traballador que se rebela en defensa dos seus dereitos".