Umha família em situaçom de desemprego e incapaz de assumir a dívida com o Banco Santander recebeu nesta manhá a visita de um grande número de polícias para proceder à expulsom da vivenda, que será entregue à referida entidade bancária.
Umha concentraçom convocada por STOP Despejos Compostela reuniu dúzias de pessoas solidárias, que nom conseguírom evitar a aplicaçom da ordem de despejo e mesmo sofrêrom umha violenta carga policial, sendo detidas três pessoas, incluída umha fotógrafa de GZ Contrainfo e um sindicalista da CUT.
A casa objeto da ordem judicial foi construída pola própria família que a habitava, que pagava a hipoteca até ficarem os seus membros sem emprego. Depois de vários adiamentos da ordem, hoje finalmente impujo-se a lógica do capital: A família, em situaçom de "especial vulnerabilidade", ficou na rua e a casa, vazia.
Tampouco os serviços sociais do concelho e da Junta tenhem facilitado umha saída digna à dramática situaçom desta nova família afetada pola política de despejos vigorante no Estado espanhol. Volta a evidenciar-se que a legislaçom e as instituiçons estám ao serviço dos interesses dos bancos e entidades financeiras frente ao direito fundamental a umha vivenda digna.
Fotos: GZ Contrainfo e Xoán A. Soler.