A esquerda independentista galega instituiu a data em 2001, ano da fundaçom de NÓS-Unidade Popular, realizando-se desde entom atos em diferentes pontos do País, organizados pola própria NÓS-UP e pola AMI. Desta vez, com a recente autodissoluçom da histórica entidade juvenil, Causa Galiza pegou no testemunho para convocar o seu próprio ato na capital galega às 17 horas.
No caso de NÓS-Unidade Popular, o seu tradicional ato político decorreu neste sábado às 13 horas na vila costeira de Rianjo, lugar de nascimento do patriota Daniel Castelao, morto no exílio após ter que abandonar a Galiza devido à ditadura militar franquista e à aberta perseguiçom das ideias e militantes do movimento patriótico galego.
Ao pé do busto de Castelao, tomárom a palavra a dirigente juvenil Eva Cortinhas, o historiador Uxio-Breogán Diéguez Cequiel e José Dias Cadaveira, em representaçom da Direçom Nacional de NÓS-Unidade Popular, apresentados e apresentada por Maurício Castro.
A oradora e os oradores coincidírom em assinalar Castelao como referente central na história do século XX galego e na conformaçom do movimento patriótico, assim como a evoluçom para posiçons independentistas na última etapa da sua vida, "ponto de partida" para a atual esquerda independentista, segundo indicou José Dias Cadaveira.
As intervençons fôrom alternadas com música de gaita e dérom passagem a umha oferta floral no monumento a Castelao, cantando conjuntamente o Hino Nacional da Galiza.
Como é habitual cada ano, NÓS-UP editou um caderno de divulgaçom da figura homenageada e do significado da data, que neste ano atingiu a décima quarta ediçom.
Causa Galiza em Compostela
A carvalheira de Santa Susana acolheu o ato convocado por Causa Galiza neste 11 de outubro, onde Xesus Samjoás, militante fundador da UPG, se dirigiu às pessoas participantes lembrando as primeiras convocatórias do Dia da Pátria durante o franquismo.
O Dia da Galiza Combatente foi dedicado por Causa Galiza às figuras de José Vilar e Lola Castro, militantes do EGPGC mortos numha açom armada contra interesses do narcotráfico em 1990.
Fotos: 1 NÓS-Unidade Popular em Rianjo (@nosgaliza). 2 Causa Galiza em Compostela (@causagaliza)
