Fotos: 1 Ato da UPG em Ferrol (Sermos Galiza). 2 Concentraçom de NÖS-UP na rua da Terra de Ferrol.

No maior ato dos convocados, o que foi partido de Moncho Reboiras, a UPG, realizou a sua tradicional oferta floral no lugar onde o jovem Reboiras caiu ferido de morte. A seguir, as duas centenas de participantes dirigírom-se ao Teatro Jofre, onde três dirigentes discursárom lembrando o valor da entrega militante e reclamando a vigência da auto-organizaçom no contexto político atual. Poesia e música de Paco Montero alternárom com as intervençons de Andrea Martins, Iván Ribas e Néstor Rego.

NÓS-Unidade Popular realizou um ato comarcal, com participaçom de 80 pessoas, na rua da Terra, à porta do prédio onde José Ramom Reboiras foi assassinado. Para além da oferta floral, ouvírom-se as notas da gaita na interpretaçom do Hino do Antigo Reino da Galiza e do Hino Nacional, além das intervençons políticas de Eva Cortinhas, dirigente de BRIGA, e Maurício Castro, de NÓS-UP. A esquerda independentista, salientárom, "reivindica e tenta projetar para o futuro os princípios que guiárom a geraçom de Reboiras", o que hoje se plasma, para NÓS-UP na defesa da auto-organizaçom nacional, o independentismo alicerçado na construçom nacional e um programa inequivocamente de esquerda para enfrentar o sistema e o regime.

No cemitério de Imo, em Dodro, ao pé dos restos de Reboiras, militantes e simpatizantes do MGS lembrárom Moncho Reboiras num ato político em que se lembrou a sua trajetória militante no sindicalismo, ativismo cultural e político. Tomárom a palavra Bieito Pérez, do BNG local, Xesús Chaves, da Associaçom Memória Histórica do 72, Noa Presas, da direçom do MGS, e Anxo Noceda, secretário-comarcal da CIG em Compostela. Reproduzimos abaixo o vídeo do ato realizado por GZ Vídeos.