Recursos, atividades, informaçons e campanhas de sensibilizaçom online e nas ruas tenhem dado conteúdo até agora ao projeto que, sob o nome de 'Apego', tenciona favorecer a transmissom lingüística entre geraçons.

Treze cámaras municipais e Coordenadora de Trabalhadoras pola Normalizaçom Lingüística dinamizam a iniciativa. As instituiçons parcipantes até hoje som as de Ames, Banha, Carvalho, Carnota, Ferrol, Narom, Negreira, Ourense, Ponte Vedra, Redondela, Rois, Compostela e Vigo.

É pouco habitual ver instituiçons com iniciativa em matéria lingüística, daí que sublinhemos a iniciativa, dirigida a famílias com crianças entre 0 e 6 anos, às quais se tenta disponibilizar todo o tipo de recursos (nomes, contos, jogos, música...) além de umha agenda de atividades para a socializaçom em galego das crianças.

Apesar das limitaçons do projeto, que inclui um número muito reduzido de cámaras e de recursos, vale a pena conhecer o pouco que se fai a nível institucional pola nossa língua. Toda a informaçom sobre o projeto está disponível  no seu site.

Obradoiro de recursos para escolas infantis em Redondela

Nesta mesma quinta-feira, dia 14 de janeiro, começa em Redondela um obradoiro que se prolonga até 21 do mesmo mês, organizado polo Serviço de Normalizaçom Lingüística e polo Projeto Apego, para favorecer o acesso a recursos no nosso idioma por parte das escolas infantis.

Destinado a pessoal das escolas infantis, a atividade é gratuita e decorre de 16:30 a 20:30 na Casa da Cultura de Redondela.

Pode-se contatar com a organizaçom no telefone 986 400 106 ou no co-e normalización@redondela.es.