O Sindicato de traballadoras e traballadores de ensino de Galiza considera un éxito a paralización de facto dunha proba que contaba co rechazo unánime de toda a comunidade educativa. A implicación de asociacións de nais e pais, do alumnado, do profesorado e de organizacións sindicais ten sido fundamental para que a reválida de 3º de primaria recollida na LOMCE, e que comezaba hoxe a súa celebración en Galiza, non teña os efectos dañinos para os que foi deseñada.
A cerrazón da administración, insistindo en continuar adiante coa proba, chocou frontalmente coa postura dunha comunidade educativa que rechaza a reválida por motivos moi diversos, entre eles por entrar en contradicción co método de avaliación continua e global, por supoñer un estres innecesario e contraproducente a alumnado de 8 anos e por usar eses datos para establecer ránkings de centros e asignar recursos segundo os resultados das probas.