Foto de Galiza Foto (cc by-nc/2.0/) - Manifestaçom polo galego em Compostela.
A plataforma Queremos Galego convocou mais um ano mobilizaçons no Dia das Letras Galegas para reclamar um maior uso e proteçom do idioma, permanentemente agredido polas autoridades espanholas e as suas sucursais autonómicas.
Tal como tem acontecido noutras ocasions em proximidade de citas eleitorais, a plataforma de defesa do galego - vinculada à UPG, corrente maioritaria no BNG - prescinde de umha grande mobilizaçom em Compostela e convoca mobilizaçons em sete localidades da Galiza. Queremos Galego fai a sua convocatória em solitário, também coincidindo com o acontecido no passado nas datas prévias a eleiçons de diferentes níveis, sem esperar umha possível unidade de açom com todas as outras entidades de defesa e promoçom da língua e cultura da Galiza.
Alguns coletivos habitualmente participantes no Bloco Laranja sim participarám nas convocatórias de hoje. É o caso da Fundaçom Artábria, que realizará umha ruada própria polo bairro ferrolano de Canido, galeguizando o nome de várias ruas e visibilizando um bloco laranja que irá confluir na concentraçom de Queremos Galego. Também em Compostela e na Corunha haverá presença do Bloco Laranja.
Em Compostela, mais umha vez, sabotagem da Cámara Municipal
A Cámara Municipal de Compostela, dirigida polo galegófobo Partido Popular, tentou, mais umha vez, sabotar a mobilizaçom em favor do galego. Nom é umha novidade, já que é a estratégia seguida na prática totalidade das manifestaçons populares desde que o PP acedeu ao mando da capital da Galiza por 11 votos de vantagem em 2011.
O governo municipal nom autorizou o uso de umha tomada elétrica na praça das Pratarias para poder usar a megafonia para dar leitura ao manifesto da convocatória. Para o Presindente de Queremos Galego, Marcos Maceira, "dá vergonha alheia que ao alcaide da capital de Galiza lhe doia tanto que a gente se expresse em favor do seu idioma".
Galego, garantia de futuro
"Galego, garantia de futuro" é a legenda escolhida para a mobilizaçom de hoje, e titula o manifesto ao que se dará leitura no final das mobilizaçons, e o qual pode ser lido e assinado no blog de Queremos Galego.
Compostela, Corunha, Ferrol, Lugo, Ponte Vedra, Riba d'Eu, Vigo
As mobilizaçons de Queremos Galego neste 17 de maio de sairám às 12:00 em todas as localidades - exceto em Lugo, às 11:30, com os seguintes pontos de partida:
Vigo: Via Norte com Urzaiz.
Compostela: Praça das Pratarias.
Ferrol: Praça do Cruzeiro (Canido)
Corunha: Teatro Rosalia (Rego da Água)
Ponte Vedra: Praça da Peregrina
Lugo: Praça Maior
Riba d'Eu: Quatro Ruas