Mais um ano, vemo-nos na obrigaçom de denunciar o esbanjamento de dinheiro público de todos e todas as ferrolanas num evento religioso como é a chamada "Semana Santa".
Desta vez, na passada quarta-feira, o alcalde "popular" José Manuel Rey Varela assinava o que definiu como "a ajuda mais generosa das concedidas até agora": 75.000 euros, ao qual se soma umha "surpresiva" estátua de bronze de um capuchom católico chantada em plena rua real (20 mil euros).
Perante este novo "roubo" ao conjunto da vizinhança de Ferrol, NÓS-Unidade Popular quer manifestar:
1.- A "Semana Santa" é umha festividade do integrismo católico, que exalta os valores mais rançosos e reacionários nacional-catolicistas e militaristas. Um evento religioso alheio por completo à idiosincrasia e tradiçons nacionais galegas, imposto na nossa cidade polo franquismo, imitando as procissons das cidades andaluzas e castelhanas.
3.- Até hoje, nengum Governo municipal tivo a dignidade de retirar o financiamento às entidades privadas que organizam os desfiles integristas. PP, PSOE, IU, Independentes por Ferrol e BNG levam esbanjados 1.000.000 euros públicos nos últimos 15 anos em subsídios para fomentar a chamada "Semana Santa" ferrolana. Talvez por isso todos eles continuem a justificar esse desvio de fundos públicos para iniciativas confessionais e privadas.
4.- Nem a escusa do turismo, nem a defesa de umha cultura elitista e confessional podem justificar este apoio desproporcionado a atender aos gastos de umha Igreja milionária como é a católica, careterizada pola sua aberta oposiçom às ideias de progresso e justiça social.
5.- Reclamamos a suspensom da colaboraçom económica com a Junta General de Confrarias, porque é ilegal conforme a direito, porque privilegia umha confissom religiosa perante as outras e perante a populaçom nom praticante de religiom algumha, a maioria.
6.- Reclamamos igualmente a imediata retirada do capuchom de bronze chantado na rua Real e que o PP devolva imediatamente os 20 mil euros públicos que gastou nessa brincadeira de mau gosto. Se o alcalde e os seus amigos querem exibir capuchons, que o fagam nas suas casas e com o seu dinheiro!
7.- Solicitamos que os 75.000 euros sejam utilizados para arranjar problemas realmente importantes de um concelho com um 30%de desempregad@s.
8.- Por último, reclamamos que as diversas candidaturas "alternativas" que venhem configurando-se de cara às eleiçons municipais esclareçam se vam manter o financiamento público desse tipo de atividades no caso de chegarem ao governo municipal.
Ferrol, 25 de março de 2015
Assembleia Comarcal de NÓS-Unidade Popular
