Compostela Aberta é un movemento cidadán que comezou a artellarse hai uns meses entre veciños e veciñas de Santiago, produto da indignación tras anos dun goberno corrupto, no que o tráfico de influencias, o despilfarro e a prevaricación primaban sobre as necesidades da xente do noso Concello. “Estamos no nacer dun tempo novo, con novas formas de facer e de estar, pois sabemos que a Democracia Real será sinónimo de cooperación, de calidade de vida e dun futuro mellor, no cal colleremos todas e todos”, declara no seu manifesto Compostela Aberta.

E continúan no manifesto explicitando que a elección do nome non é casual, o Aberta é unha declaración de intencións. Compostela Aberta abre un proceso para elaborar o seu programa coa cidadanía, ainda que algunhas ideas forza terán que estar presentes e dar lugar a mecanismos concretos: Transparencia, Democracia Real e Dereito á Cidade para todas e todos.  

Compostela Aberta elaborará a sua candidatura mediante o procedimento de pirmarias abertas a toda a cidadanía do concello. Invita a todas as persoas a sumarse a sua asemblea quincenal e especialmente aos seus grupos de traballo, dos que irán informando puntualmente na súa páxina web www.compostelaaberta.org. A colaboración de todas é precisa. Chegou o momento da revolución democrática.