Apesar da chuva, frio e mesmo saraiva, as ruas de Compostela registárom umha importante mobilizaçom contra as políticas neoliberais do PP no setor do mar, com coletivos chegados de diferentes pontos da Galiza costeira.
A tentativa da conselheira das pescas de desativar a mobilizaçom retirando o projeto de lei de aquicultura nom conseguiu o seu objetivo, e o Obradoiro encheu de pessoas e palavras de ordem contras as políticas da Junta e do governo espanhol.
Um mar de fundo de anos de queda da atividade, das áreas de pescas, de desamantelamento da frota, de quotas restritivas, de serviço crescente às transnacionais aquícolas... provocou a resposta de hoje, que deverá ter continuidade para conseguir alguns dos seus objetivos marcados.
"O mar é o nosso futuro" foi a legenda da faixa de cabeça. Cartazes, faixas e palavras de ordem de marinheiros em defesa da frota galega de pesca, através de umha repartiçom justa das quotas, a defesa das pensons dignas, do cerco e a atividade extrativa sustentável numhas rias regeneradas. "Contra a privatizaçom do mar" foi outra das palavras de ordem que sintetizárom o miolo da reivindicaçom massiva de hoje na capital da Galiza.
A reclamaçom de fundo foi que o governo galego se ponha ao serviço do setor na defesa dos interesses produtivos numha Galiza em processo de empobrecimento e carente de mecanismos de autodefesa da sua capacidade de produzir e viver dos seus recursos.
Para além dos trabalhadores e trabalhadoras, entidades ambientalistas somárom-se à mobilizaçom.
Foto: @ngarciafigueira