Os resultados case non sorprenderon a ninguén: 100% da representación para a CUT, que pasaba de ter un delegado a obter os tres postos representativos.

Os tres compañeiros e compañeiras Dina Casais, Leonardo Da Cruz e David Rei, presentábanse ás eleccións no seo dun fondo conflito coa empresa que decidira despedir a David Rei, secretario da sección sindical e candidato, unha vez preavisadas as eleccións. A central sindical decidiu candidatar igualmente ao amparo de diversas sentenzas ao compañeiro David Rei, que finalmente obtivo acta de delegado. Hoxe, este compañeiro atópase na situación irregular de ser representante dos traballadores e traballadoras e seguir loitando pola súa readmisión.

Brais González, secretario de Acción Sindical da CUT Compostela, calificaba esta mañá de "clara vitoria contra a represión sindical" os resultados, ao tempo que aseguraba "que este resultado contén unha mensaxe nidia para a empresa do conxunto do cadro de persoal; o fartádego da presenza de prácticas antisindicais na empresa, ao que se suma o premio colectivo a unha práctica sindical coherente e de radicalidade democrática e asemblearia".

A Sección Sindical da CUT no centro, garante deste éxito sindical, celebraba na tarde de onte os resultados "coa firme decisión de seguir a loitar pola readmisión de David Rei Varela, posto que non permitiremos que este compañeiro, agora delegado, fique na rúa. Querémolo connosco".

A CUT asevera que "non permitirá neste momento nin a máis mínima práctica antisindical, xa que as traballadoras e traballadores decidiron apostar por unha representación colectiva firme e por unha voz unánime". Ao tempo, comprométense a anunciar en breve prazo as diferentes decisións mobilizadoras que se están a barallar para demandar publicamente a readmisión de David Rei.