Foto: Guillaume Paumier
Com motivo da celebraçom do Dia Internacional do Orgulho LGTBI o próximo 28 de junho, a associaçom Nós Mesmas acaba de fazer pública a agenda de atos reivindicativos que decorrerám em Vigo do 17 ao 28 deste mês. Segundo Nós Mesmas, o objetivo é denunciar "as discriminaçons e vulneraçons de direitos" que sofrem as pessoas LGTBI na Galiza, onde existe um alto índice de delitos de ódio por orientaçom ou identidade sexual, umha lei de igualdade e nom discriminaçom que invisibiliza a comunidade LGTBI e um Plano Galego do VIH que estigmatiza e estereotipa as relaçons homossexuais.
As atividades programadas incluem exposiçons, roteiros, projeçons e charlas, e culminará numha grande jornada de luita e festa. A organizaçom denunciou que o Concelho de Vigo nom concedeu o permisso para alongar a festa até as 03h00, tal e como permitem as ordenanças municipais, e atribuiu essa decisom ao escasso interesse do Concelho na celebraçom dumha data como o 28 de junho.
Publicamos a seguir a programaçom completa. A entrada a todos os atos será de graça.
De 17 a 26: Exposiçom fotográfica "Abrindo portas à diversidade" de Javier Piñeiro no Centro Cívico de Teis.
De 22 a 26: Exposiçom de filmografia e literatura de temática nas Bibliotecas Públicas Pondal (Casco Velho) e Neira Vilas.
Domingo 21: Caminhada no Rio Lérez com encontros às 11h00 na Laxe (Vigo) para saida e às 12h00 na ponte pedonal da praia fluvial de Ponte Vedra.
Segunda-feira 22: hasteamento de bandeira no Concelho de Vigo.
Quarta-feira 24: Projeçom de curtametragens de La Pecca, com a colaboraçom de Entiendes e posterior palestra com o Cineclube Lumiére de Vigo sobre a trajetória da imagem do coletivo LGTBI no cinema. Será no Museu MARCO a partir das 19h00.
Sexta-feira 26: Mesa-redonda "A transexualidade: da infância à idade adulta" com Beatriz Suárez Briones, Associaçom Chrisallis e Laura Bugalho. Na cafetaria Hashtag (López Mora, 26) a partir das 20h00.
Sábado 27: Festa na Praça da Pedra durante todo o dia.
. Às 12h00 atividades infantis com o palhaço Tachán e conta-contos
. ÀS 18h30 atuaçom do quarteto Vatapá
. Às 19h30 manifestaçom "Orgulho é Reivindicaçom", com início e fim na Praça da Pedra
. Às 21h00 atuaçom Ge Drag
. Às 21h30 atuaçom Rodrigo Cuevas
. De 22h30 a 00h00 atuaçom DJ Pettro
