Todo o material gráfico e audiovisual deste artigo é da autoria do Diário Liberdade, de livre reproduçom de preferência citando fonte.
O tempo, que estivo muito mutável ao longo do dia, inclusive com algum momento de chuva intensa prévio à saída, nom impediu que perto de 1.000 pessoas secundassem o chamado da organizaçom ecologista.
Como já é tradicional nesta marcha a mobilizaçom partiu por volta das 20 horas, dividida em dous blocos, das alamedas de Ponte Vedra e Marim para acabar fundindo-se ambas ao pé da pasteira.
O complexo assente em Louriçam, que nos últimos tempos sofreu importantes reveses judiciais com sentenças contrárias aos seus interesses, recebeu aos/as manifestantes com umha serie de faixas penduradas na sua porta de acesso, alusivas as supostas bondades e benefícios de ENCE. A provocaçom foi fortemente contestada polas pessoas presentes com o berro de palavras de ordem como "ENCE fora da ria", "fechamento já" ou "digam o que dixerem, ENCE contamina".
Os atos de encerramento com a intervençom e leitura do manifesto realizárom-se ante as portas da pasteira com a novidade de que nesta ediçom ocupou-se a via encostada à ria em vez da mais próxima ao complexo.
No manifesto incidiu-se nas recentes sentenças judiciais contrárias a ENCE e ELNOSA referentes ao acordo de supramunicipalidade que afeta diretamente as Autorizaçons Ambientais Integradas (AAI), e ao arquivamento do intento por parte de ENCE de criminalizar a liberdade de expressom por parte da APDR. Também se referiu às campanhas publicitárias e patrocínios que procuram dar umha lavagem de imagem à pasteira, e criticou-se as fumigaçons dos montes de eucaliptos com pesticidas.
Noutro senso, a APDR alertou sobre a possibilidade de que se produza umha modificaçom da Lei de Costas por parte do governo espanhol que permita umha prolongaçom no tempo da concessom, a qual poderia chegar até os 30 anos, facilitando a perpetuaçom do complexo de ENCE e ELNOSA na ria.
Tal como assinalou a organizaçom ecologista, os postos de trabalho nom servem de escusa "ENCE é o problema nom a soluçom". O complexo ENCE-ELNOSA destrói mais postos de trabalho dos que cria, além dos custos ecológicos, sanitarios, paisagísticos, entre outros, que som razons mais que suficientes para que abandone Louriçám de imediato.
Ante os tempos que chegam, os quais seram cruciais para a continuaçom ou desmantelamento da pasteira, só a mobilizaçom e a contestaçom nas ruas por parte da vizinhança impedirá que o complexo ENCE-ELNOSA se perpetue na ria, aproveitando-se do momento de profunda crise que vivemos.