Se inicialmente parecia que as greves gerais da Galiza e Euskal Herria teriam convocatórias só das centrais nacionais com o apoio doutras minoritárias, ontem saltou a surpresa com a provável adesom de UGT e CCOO de ambos países, no que poderia ser um ensaio para umha convocatória posterior no conjunto do Estado espanhol.

Por um lado, parece pesar a possibilidade de que as convocatórias nacionais basca e galega corram bem para os movimentos sindicais mais combativos, que se desmarcárom do pactismo das cúpulas de UGT e CCOO. Por outro, a utilidade de um ensaio parcial para estender a iniciativa ao conjunto do Estado espanhol ajudaria a apoiar as greve gerais galega e basca no próximo dia 29 de março.

Por enquanto, CCOO e UGT reconhecêrom que estudam umha convocatória "a finais de março", sendo o dia 29 o anterior à aprovaçom dos orçamentos polo governo espanhol do PP, no que será um passo mais nos criminosos ataques aos direitos sociais e laborais dos povos presos pola soberania espanhola.

As direçons das principais forças sindicais espanholas vam estudar nos próximos dias a possibilidade, se bem levam dias repetindo que trabalham na convocatória de umha greve geral.

Entretanto, na Galiza está confirmada a participaçom da CNT, CUT e CGT na jornada de greve convocada inicialmente pola Confederaçom Intersindical Galega (CIG), cuja aposta mobilizadora se veria reforçada pola adesom de CCOO e UGT, que juntas contam com a maioria da representaçom sindical na Galiza.