Queremos aclarar que o documento nom é o programa político de Almuinha, nem tam sequera pretende recolher todas as propostas da nossa associaçom. Estas Propostas som umha série de ideias que estabelecem indicaçons e orientaçons de por onde consideramos que deve dirigir-se a política local nos vindeiros anos.
Nestas Propostas recolhemos muitos pontos que consideramos centrais como som: Lingua e Cultura; Economia e Serviços Sociais; Serviços Públicos; Ecologia; Democracia Participativa e Escola Naval Militar.
* Quanto à Lingua e Cultura consideramos necessárias actuaçons precisas que garantam a defesa e promoçom da nossa lingua e da nossa cultura. O galego continua perdendo falantes e é imprescindível que se tomem medidas urgentes desde o concelho, dentro das suas competências, para reverter esta situaçom, mentres a nossa cultura (música, desportos...) continúa sem ter o apoio necesário que a dignifique.
* Por seu turno, vivemos num sistema económico profundamente injusto, desigual e discriminatório que nestes tempos de crise está a aprofundar os seus efeitos sobre a imensa maioria da populaçom. É precisa umha política económica radicalmente distinta desde a Cámara, e de apoio às classes trabalhadoras.
* No que se refere aos Serviços Públicos, nós apostamos sem dúvida por eles e estamos contra as privatizaçons, que implica que as empresas se beneficiem economicamente da prestaçom de determinados serviços, enquanto se piora o serviço prestado e as condiçons laborais dos seus trabalhadores/as.
* Por sua vez, é fundamental compatibilizar o progreso e o trabalho com o respeito do ambiente. Nom podemos aceitar que se destrúa o ambiente a cambio de um número determinado de postos de trabalho, que hipotecam o futuro da nossa terra e das geraçons vindeiras. É imprescindível a criaçom de trabalho, mas respeituoso com o ambiente.
* No que se refere à Democracia Participativa, o sistema político desincentiva a participaçom e fomenta a apatia da cidadania, reduzindo-se a participaçom à emisom de um voto cada 4 anos. Consideramos fundamental o estabelecemento de medidas que garantam a participaçom da cidadania na toma de decisons, fomentando a corresponsabilidade e a transparência nos asuntos públicos.
* Quanto à E.N.M. cremos que é importante iniciar o debate em relaçom à sua permanência no nosso concelho. Marim vive de costas ao mar, e em boa medida por causa da E.N.M., que ocupa uns terreos, moitos dos quais estám completamente infrautilizados, que poderiam ser aproveitados para o goce da cidadania de Marim. Além disto, somos contra a sua permanência, entre outras cousas, polo papel das Forças Armadas, encarregadas de defender a integridade terrotorial do Estado espanhol, negando com isto o direito democrático mais fundamental de qualquer povo (reconhecido em multitude de acordos internacionais), que é o direito de autodeterminaçom, que é simplesmente que cada povo poida decidir livremente o seu futuro.
Por último, queremos agradecer a boa acolhida que estám a ter as nossas propostas nos partidos, já que menos umha candidatura todos nos respostarom comprometendo-se a estudar estas propostas de cara a poder incluir as que considerassem oportunas nos respeitivos programas eleitorais. Amais, nestas últimas semanas mantivemos reunions com alguns partidos políticos com representaçom no concelho para explicar e debater algumhas destas propostas que fazemos, assim como também para intercambiar pontos de vista em relaçom com diversos aspeitos da nossa vila.