Compostela, Vigo, Ourense e Corunha som as cidades galegas onde se registárom concentraçons que continuam a congregar um importante número de pessoas, se bem inferior a dias anteriores, e a emitir mensagens contraditórias quanto à natureza e objetivos dos protestos.
O descontementamento polo bipartidarismo, polo "circo da política" e a crise económica juntárom-se com o rejeitamento às "siglas" nas concentraçons de centenas de pessoas em praças do centro das quatro cidades galegas onde se mantém a iniciativa mobilizadora.
De maneira assemblear, as pessoas participantes decidírom estabelecer acampamentos permanentes até o dia das eleiçons municipais, que decorrem no próximo domingo. As concentraçons e acampamentos na Galiza fam parte das numerosas convocadas no Estado espanhol, com destaque para a de Madrid, onde milhares de pessoas mantenhem um acampamento na praça do Sol da capital espanhola.
No seguinte vídeo recolhem-se intervençons espontáneas de pessoas participantes na concentraçom de Vigo:
Continua aberta a polémica sobre o que poderá dar de si umha movimentaçom alegadamente surgida nas redes sociais da Internet e que aspira a "umha verdadeira democracia" sem assumir qualquer definiçom política.
Enquanto alguns meios de comunicaçom europeus e americanos falam de umha nova Taharir no coraçom da Europa (em referência à praça egípcia que nucleou a oposiçom popular à ditadura até a sua derrubada), nos próximos dias veremos aonde está disposto a chegar o descontentamento manifestado de maneira inesperadamente maciça no Estado espanhol.
Fotos: 1. Corunha (Rodri, Lockerz); 2. Vigo (@rnquela, twitpic); 3. Concentraçom na praça do Obradoiro (acampadaSCQ, Compostela); 4. Acampamento na praça do Obradoiro às 2:00h de hoje, Compostela (RTVG).