"Queremos ser umha naçom livre na Europa" ressoa como um martelo constante e é possível ler em multidom de declaraçons de representantes políticos soberanistas e esquerdistas.
E onde, se nom, vamos estar ao sermos naçons livres? Por acaso qualquer pessoa com dous dedos de testa pode propor sermos umha naçom livre na Asia? Ou em África? Quiçá na Oceánia?
Por acaso qualquer pessoa acha possível a existência de setores soberanistas que, ao atingirmos a nossa liberdade, -que atingiremos- ham de utilizar escavadoras e maquinaria pesada para deslocar a nossa naçom libertada para outro continente? Qual é o motivo da utilizaçom desta redundáncia? Nom somos já europeus?
Quer a Galiza, quer a Catalunya, ou quer Euskal Herria sendo estes livres e naçons sem estado, é umha obviedade que se trata de povos europeus.
Nom será que utilizam o termo "Europa" em lugar de utilizarem o termo "Uniom Europeia"? Será que é isto?
A Uniom Europeia nestas alturas da história requer poucas definiçons. A Uniom Europeia nom é mais que a ferramenta política e económica dum conjunto de estados opressores, com que afiançam um capitalismo cada vez mais voraz e insaciável como estamos a ver nestes dias.
A Uniom Europeia é umha entidade imperialista que protagonizou inúmeras agressons face diferentes povos do planeta. A tragédia da Líbia ou da Síria, onde os europeus intervenhem com o maior descaramento, afiançando ou tentando fazer regímes medievais e integristas religiosos, impondo a ditas populaçons realidades retrogradas é umha evidência perante os nossos olhos. E todo com o único fim de saqueá-los e roubar-lhes as suas riquezas naturais. Isso é a Europa.
A Uniom Europeia é umha entidade ultra-liberal que nom permite no seu seio qualquer um tipo de socialismo. Nem do Século XXI, nem do XIX, nem de qualquer outro século ou caraterística. É umha contradiçom irresolúvel afirmar que queremos o socialismo (seja ele do tipo que for) e afirmar que se quer um povo livre na Europa.
A Europa, para te reconhecer como Estado, vai exigir a tua integraçom nas políticas criminais económicas. Além de exigir a aplicaçom do capitalismo que eles decidam para ti. No entanto, é possível fazer esta questom a Irlanda, Roménia, Bulgaria etc.
A Europa nom vai permitir qualquer experiência pola esquerda. O único socialismo que vai reconhecer é o socialismo de Zapatero ou Hollande. Quer dizer, umha social-democracia direitista que nem liberta a classe operária nem ninguém.
Assim mesmo Europa ou a Uniom Europeia para te reconheceres como estado vai pôr acima da mesa a exigência de te somares a suas estruturas militares e participes nas agressons presentes e futuras contra povos de África, Asia, ou América. Vás-te tornar um cúmplice do imperialismo, se nom, Europa nom vai permitir tua independência. E meios possui para isto.
A Uniom Europeia é umha das patas que sostém esta mesa de opulentos que é o sistema capitalista. Mesa em que começam a abundar pessoas despejadas das suas moradias, sen trabalho nem esperança qualquer. Expirou o capitalismo "fixe" e expirou o tempo do estado do bem-estar. Estas pessoas, começan erguer e exigir seus direitos legítimos e, a estas pessoas, estados em aparência democráticos aplicam-lhes a política do cacete. As pessoas espancadas, detidas e reprimidas nesta Europa do capital começam a ser milheiros, e esta é a política que vam exigir. Eles vam-te dizer que, se quigeres ser um "estado livre na Europa", terás que te armar e dispor de polícias dispostas a espancar e reprimir o teu próprio povo. Nom che vam oferecer qualquer alternativa.
Enfim, estes som alguns dos dados frios e objetivos do que supom sermos um "estado livre na Europa". Os exemplos abundam e alguns já se citárom, mas poderia mencionar a Croácia, Eslovénia, Polónia e um longo et cétera, que som supostamente "estados livres na Europa" e que cumprem com exatidom as condiçons impostas de Bruxelas e das esquadras da Europa.
Para sermos autenticamente um povo livre, temos de sair da Europa. Nom da Europa geográfica, com certeza, mas sim desta estrutura imperialista denominada "Uniom Europeia". Além de dizermos com toda clareza que um projecto socialista é incompatível com esta Europa.
Um povo com ansias de ser um povo livre na Europa, mas com maiúsculas, tem de escrever com letras de lume na sua agenda a saída imediata da Uniom Europeia, e a rutura total com o capitalismo. É aí onde começa a construçom do socialismo, depois já veremos que tipo de socialismo...
Porque a liberdade dos povos e dos seres humanos nom é possível na Europa. E porque neste caso as expressons som muito importantes. Nom confundamos a Europa com a Uniom Europeia e devemos de oferecer clareza nas mensagens políticas.
Os nossos povos nom precisam da licença de qualquer entidade imperialista para ser livres e percorrermos o nosso próprio caminho na construçom do socialismo.