Varias decenas de inmigrantes pereceron afogados no día de onte cando trataban de alcanzar a costa española. A pesar de que foron localizados e fotografados, antes de naufragar, por un avión de Frontex que participaba na Operación Indalo, esta axencia non procedeu a mobilizarse para o seu salvamento. Este correu a cargo de Salvamento Marítimo da Garda Civil, unha vez que pereceran afogados decenas dos tripulantes da patera, rescatando18 persoas e recuperando os corpos de 14 dos afogados, permanecendo desaparecidos uns 40.
Denunciamos a pasividade de Frontex, por non acudir ao rescate destas persoas.
Denunciamos o intento da Garda Civil de entregalas a Marrocos, onde foron levadas de inmediato, o que non lograron ao non aceptar ese país facerse cargo dos náufragos.
Responsabilizamos destas mortes, que se suman a varios millares máis acaecidas nestes anos na costa africana e do Mediterráneo, ás políticas de control de fronteiras no mar que impulsa a UE e o estado español.
Reclamamos que o Goberno español non castigue aínda máis os sobreviventes desta traxedia, expulsándoos aos seus países de orixe e que permita a súa estadia legal no noso país por razóns humanitarias. As organizacións abaixo asinantes, ante a posibilidade de que estas persoas sexan conducidas a un Centro de Internamento, mobilizarémonos para que sexan respectados todos os seus dereitos.
Esiximos o fin desta política de peche de fronteiras que está a converter o Mediterráneo nunha fosa común.
Asinan: Andalucía Acolle, Asociación Prol Dereitos Humanos de Andalucía, ELIN e Federación estatal de SOS Racismo, organizacións membros, no estado español, da rede euro-africana Migreurop.
Foto: 20 minutos - Naufragio.