Perante 50.000 pessoas no Camp Nou e milhons através da TV, rádio ou redes sociais, o brasileiro Neymar falou catalám na apresentaçom dele em Barcelona. Com naturalidade, mesmo assinalou que, como brasileiro, lhe era mais fácil falar catalám que espanhol. A reaçom da caverna mediática espanhola já condenou o brasileiro entre acusaçons que vam desde que se deixou lavar o cérebro até a suposta simpatia do brasileiro polo independentismo catalám.

O certo é que Neymar recebeu aulas de catalám durante os quatro dias que estivo concentrado com a seleçom brasileira. As aulas fôrom ministradas por Bel Juvinyà, umha catalá residente em São Paulo. Em declaraçons a La Xarxa recolhidas polo diário desportivo Sport, Juvinyá dixo que ensinou uns “conceitos básicos" do idioma do leste peninsular.

E se vinhesse para umha equipa galega?

Neymar, brasileiro, falou catalám na apresentaçom dele como jogador do Barça. Nom seria raro que, se ficasse numha equipa basca, falasse em basco, tal e como figérom outros jogadores.

No entanto... e se fichasse por um clube galego, Celta ou Déspor? Apesar de ser brasileiro falaria o idioma comum no ato de apresentaçom em Balaídos ou Riaçor? Ou faria-o num espanhol ruim, como outros brasileiros que passárom pola Galiza?