Segundo a reportagem televisiva, trata-se de umha organizaçom denominada 'Resistência Galega', cujas acçons terám aumentado de maneira importante no último ano, o que permitiria ao tribunal político espanhol considerar essas acçons como realizadas por umha "organizaçom terrorista", com o que isso implicaria em termos repressivos.
O Ministério do Interior espanhol atribui "treze acçons" ao suposto grupo independentista, que segundo a TVE mudou recentemente os seus objectivos, situando "no alvo" pessoas concretas, referindo como exemplo o juiz Javier Míguez Poça, que terá sofrido um ataque da tal 'Resistência Galega'. O magistrado sai na reportagem afirmando que nom tenhem sido levados a sério o que denomina "grupúsculos" que, em sua opiniom, constituem "grupos terroristas", mas acrescenta que "agora sim".
Assuntos relacionados com a 'Resistência Galega' poderám ir para a Audiência Nacional
A procuradoria da Audiência Nacional está, segundo o documento televisivo que comentamos, a colaborar com os procuradores da Galiza para agrupar informaçons que permitam aplicar umha nova doutrina repressiva no nosso país, que levaria a julgar na Audiência Nacional espanhola os casos relacionados com a suposta organizaçom 'Resistência Galega' ou com o que for considerado "enaltecimento" em relaçom à mesma.
TVE afirma que existem "três comandos operativos" da tal 'Resistência Galega', um em Vigo, outro em Compostela e um terceiro itinerante. Inclusive aponta directamente e sem qualquer dúvida, apesar de nom ter sido julgado nem muito menos condenado, para um vizinho de Compostela, de quem di que "dirige a organizaçom na clandestinidade".
Cada grupo operativo teria, segundo a TVE, quatro integrantes e a "informaçom" policial-jornalística mesmo dá o número de "simpatizantes" com que contaria a 'Resistência Galega' em toda a Galiza: 200 pessoas.
Entre os opinadores que aparecem na reportagem, de pouco mais de dous minutos, está o extremista colaborador de El Correo Gallego Javier Navaza, assim como efectivos policiais e do aparelho judicial espanhol.
Esta nova reportagem de propaganda coincide com outras peças jornalísticas publicadas em diferentes meios que apontam na mesma direcçom, o que, caso venha a verificar-se, poderá elevar a fasquia da intensidade repressiva no nosso país.
Eis a reportagem difundida hoje mesmo polo canal público da televisom espanhola.