Mais umha vez, apostamos na expansom internacionalista, tecendo pontes com outras luitas polos mesmos direitos que reclamamos para a Galiza: a luita pola libertaçom nacional e social. Esta nova parceria soma-se às que já mantemos com Kaos en la Red (Estado espanhol), Carta Maior (Brasil) e Pátria Latina (Brasil).
Agora assinamos um novo acordo de colaboraçom com a publicaçom basca Boltxe, alargando o nosso acordo anterior, e o site catalám Llibertat.cat, ambos portais de referência na luita dos povos oprimidos contra o imperialismo espanhol e o capitalismo e pola independência e o socialismo. Esta uniom na luita levou as três publicaçons digitais a tecer umha relaçom de amizade que se plasma agora num acordo de colaboraçom baseado no intercâmbio informativo e a troca de recursos.
Assim, Diário Liberdade, Llibertat.cat e Boltxe, três projectos de referência informativa alternativa nos seus respectivos países, unimo-nos simbolicamente para se solidarizar nas suas respectivas causas e as projectarmos internacionalmente. Este acordo vai concretizar-se no intercámbio diário de notícias susceptíveis de serem dadas a conhecer a nível internacional para assim multiplicarmos a difusom.
Os três portais informativos marcam como desafio favorecer dinámicas de colaboraçom e apoio mútuo no seio da esquerda revolucionária, dado que fogem de disputas e sectarismos próprios dos movimentos, que impedem a acçom directa de confronto com o Estado espanhol pondo todo mais fácil ao sistema para a neutralizaçom da dissidência que pratica o Estado opressor. Os três projectos coincidem ao considerar legítima a discrepáncia e enriquecedoras as diferenças, mas consideram que as pugnas injustificadas estám só baseadas em atitudes sectárias e desviadas que empecem a luita e afastam a vitória.
Llibertat.cat, um projecto em constante crescimento
Llibertat.cat é o portal de Informaçom e de opiniom da esquerda independentista dos Països Cataláns.
Na actualidade, converteu-se num portal de referência ao movimento acumulando já umas 1.700 visitas diárias em média, o que significa que o número de visitas se multiplicou por cinco em quatro anos. O acompanhamento das leitoras e leitores e o esforço desinteressado de todas as pessoas que trabalham e colaboram a Llibertat.cat permitiu também superar recentemente a fasquia dos 10.000 artigos publicados no longo destes quatro anos de existência do projecto, que se consolida dia a dia com mais informaçom e opiniom e enfrentando novas mudanças para melhorar.
Llibertat.cat iniciou o seu caminho, tal como a conhecemos hoje, no ano 2006, mas nom orfa ou surgindo do nada. Llibertat.cat nascia herdeira de Llibertat.com, um portal que desde o ano 1999 oferecia à Esquerda Independentista umha ferramenta também de difusom e debate ao serviço de todo o movimento.
Devagar, Llibertat.com foi abrindo passagem como site pioneiro no mundo internauta, consolidando-se nos seus sete anos de vida como referente comunicativo da Esquerda Independentista. Portanto, em Novembro do 2006 Llibertat.com dava passagem a Llibertat.cat, que herdava o legado de sete anos de trajectória da site predecessor.
Imediatamente, Llibertat.cat deu novos ares ao seu site, renovando-o e potencializando os conteúdos, de modo que iniciava um projecto diferenciado que passou a potencializar a informaçom e a opiniom, no seio da Esquerda Independentista. Quatro anos depois, o projecto tem-se profissionalizado, com novas secçons e umha média de visitas crescente, e com o olhar posto em Novembro de 2010, quando Llibertat.cat cumpra quatro anos de vida.
Llibertat.cat apostou na altura em encher o vazio comunicativo que supunha nom termos espaços de opiniom e de debate na Esquerda Independentista. Com efeito, este vazio foi ultrapassado em grande medida, apesar de continuar a ser necessário criar mais espaços de confluência como Llibertat.cat; espaços que representem a expressom e a combinaçom das diferentes sensibilidades no seio da Esquerda Independentista.
No relativo à vertente informativa, Llibertat.cat nom só quer se dar espaço às actividades do movimento, como também às luitas populares um pouco por todos os Países Cataláns e, na medida do possível, do resto do Estado e do mundo. As luitas populares, a praxe política e o tecido associativo é que permitem visualizar umha naçom que constrói a sua identidade dia a dia.
Boltxe e a luita da esquerda abertzale
Boltxe Kolektiboa nasceu há 20 anos após a queda do muro de Berlim e do fracasso do socialismo na URSS e noutros países do leste da Europa e depois que os teóricos do capitalismo proclamassem o fim da história e a vitória definitiva do capitalismo. Nom só isto, como também dezenas de partidos e organizaçons que se autoproclamavam comunistas, recolhêrom as bandeiras e os símbolos para abandonarem a ideia da revoluçom socialista e se tranformarem em grupos ecossocialistas, progressistas, verdes, etc.
Entretanto, em Euskal Herria um grupo de pessoas sustentavam que o capitalismo era tam explorador como o tinha sido sempre e que a sua evoluçom natural era monopolizar todos os mercados e avançar para a dominaçom do planeta, arrasando pessoas e povos. Perante isto, a única resposta possível era o socialismo e a libertaçom nacional. Segundo Boltxe, tinha fracassado umha determinada experiência socialista, mas não o socialismo em si.
Boltxe enquadra-se na esquerda abertzale para proclamar que a libertaçom nacional por si só nom funciona, precisando também de se avançar para a libertaçom social e o socialismo. Neste senso, o meio informativo marca como desafio fazer difusom das ideias marxistas e de contrainformaçom que já assumiu umha revista que depois de vinte números foi refundada, no ano 2009, dando como resultado a potencializaçom do site, no sentido de se tornar em verdadeiro portal informativo e umha ferramenta útil de formaçom e contrainformaçom para projectar a aposta de Euskal Herria na soberania e o socialismo.