No caso da Galiza, a jornada juntou milhares de pessoas, se bem nom atingiu os números de 'Nunca Mais' ou das greves gerais recentes. Houvo manifestaçons em todas as grandes cidades e também noutras de menor tamanho. As manifestaçons mais numerosas fôrom em Compostela e Vigo, mas também houvo importantes mobilizaçons na Corunha, Lugo, Ponte Vedra, Ferrol e outras cidades galegas.

No caso de Compostela, Carlos Taibo dirigiu-se aos milhares de concentrados e concentradas no Obradoiro, lembrando que eram muitos mais que na visita do Papa e reivindicando o caráter galego de um movimento que se desenvolve também no nosso país.

A estratégia criminalizadora dos meios da burguesia nom servírom para desativar um movimento que neste domingo voltou com mais força às ruas da Galiza e do conjunto do Estado espanhol.

Resta agora comprovarmos qual será a reaçom do poder frente à contestaçom massiva nas ruas e quais serám os limites dessa contestaçom, umha vez que só a queda do regime político e do sistema socioeconómico atuais permitiria o cumprimento dos anelos dos milhares de pessoas que rejeitam os planos do neoliberalismo globalizado, único rosto possível do capitalismo na sua atual fase de desenvolvimento histórico.

19.00h de 19.06.11. Milhares de ''indignados'' e ''indignadas'' nas ruas das principais cidades galegas

A convocatória realizada polo Movimento 15-M em Madrid voltou a ter umha importante resposta na Galiza, com manifestaçons na Corunha, Vigo, Compostela, Ourense, Ponte Vedra e Ferrol.

A partir das 18 horas, várias cidades galegas aderírom à iniciativa madrilena do Movimento 15-M, com grandes concentraçons e manifestaçons que juntárom milhares de pessoas.

Os epicentros ficam em Madrid e Barcelona

Na realidade, as maiores manifestaçons de hoje acontecem longe da Galiza: em Madrid e Barcelona, onde marés humanas simultáneas partírom de diferentes pontos protestando contra as medidas de "ajuste" aplicadas polos governos no quadro de crise generalizada do sistema.

Nas capitais espanhola e catalá, as pessoas participantes contam-se por dezenas de milhares, aproximando-se do Congresso dos Deputados em Madrid, e partindo da praça de Catalunha no caso de Barcelona.

"A rua é nossa" e palavras de ordem contra a violência policial podem ler-se nas faixas da manifestaçom catalá, onde o idioma catalám tem umha importante presença. Referências à repressom na Ciutadella no passado 15 de junho estám presentes na multitudinária marcha catalá.

Em Madrid, junto a palavras de ordem pacifistas, destacam apelos à greve geral.

Outras muitas cidades do Estado espanhol estám a aderir à jornada de manifestaçons, como Valência, Palma, Málaga, Bilbau, Vitória, Alacante, Leom, Valhadolid, Sevilha, etc. Na maioria dos casos, o número de manifestantes conta-se por milhares.

Detidos em Paris

A polícia francesa detivo umha centena de "indignados" na capital francesa, quando tentavam manifestar-se hoje na catedral de Notre Dame, segundo denunciárom integrantes do coletivo "Acampamento Paris", que tenta somar-se às mobilizaçons do chamado movimento 15-M do Estado espanhol.

Fotos: 1: Compostela. (@mediosordo) 2: Corunha (Yfrod)

Vídeo: Galicia Confidencial.