Aos Siareiros e Siareiras Galegas se deve a organizaçom do jogo de ontem entre a Galiza e a Palestina, umha vez que a Federaçom Galega de Futebol e a Junta da Galiza, em maos do ultraespanholista PP, negárom qualquer participaçom e apoio à causa das seleçons nacionais galegas, como de resto já tinham feito no ano passado.
A Galiza jogou com a Palestina, umha naçom também negada e carente de instituiçons soberanas, e que o coletivo organizador quijo convidar para fazer causa comum com a Galiza e contra o imperialismo. O resultado final foi de 6-3 para a Galiza.
Cabe portanto salientar o compromisso popular e dos próprios jogadores, que mesmo tivérom que enfrentar os obstáculos da Federaçom, empenhada em que o jogo nom pudesse jogar-se. Porém, finalmente houvo jogo, como ponto culminante de umha jornada desportiva em defesa da autodeterminaçom da Galiza nesse ámbito.
A bilharda, como representante dos jogos e desportos tradicionais galegos, foi a protagonista na manhá ourensana neste domingo. O ambiente de festa e a importante participaçom popular caracterizárom todas as iniciativas previstas ao longo do dia, até a disputa do jogo entre as seleçons galega e palestiniana, no Estádio dos Remédios, com numeroso público.
Antes disso, umha manifestaçom percorreu a cidade, com centenas de pessoas a reclamar a plena oficialidade das seleçons desportivas galegas, incluída a participaçom nas competiçons internacionais.
Equipas galegas de diferentes categorias, aquelas que permitírom a participaçom dos seus jogadores, estivérom representadas no jogo de ontem em Ourense, sob a direçom de Pili Neira, treinadora que tomou o relevo de Fernando Vasques e de Arsénio Iglésias.
A jornada concluiu com um concerto reivindicativo, enquanto o governo autonómico, entregue aos interesses espanhóis e da burguesia vendida galega, olhava para outro lado.
Porém, e apesar de umhas instituiçons totalmente alheias aos interesses do nosso povo, a reivindicaçom de um desporto nacional galego voltou a ouvir-se neste frio dezembro de 2010.