Nesta oferta de emprego convócanse 818 prazas repartidas en varias categorías. A secretaria nacional de CIG-Saúde, María Xosé Abuín, explica que este número correspóndese coas vacantes producidas en todas categorías, no ano 2015. Fronte a isto afirma que “nós demandamos 3.000 prazas para poder cubrir, como mínimo, as amortizadas desde 2009”.
Sinala que nos anos 2010/11/12/13 só se cubriron o 10% das prazas vacantes, máis non o 10% de todas as categorías se non daquelas para as que a consellaría de Sanidade autorizou a súa cobertura. “Utilizaron este sistema para eliminar ás/aos traballadoras/es dos servizos que querían privatizar e converter a sanidade en negocio, condenado ao persoal ao desemprego e a emigración”, denuncia a CIG-Saúde.
Segundo os cálculos feitos pola CIG-Saúde, “xa que non temos ningún mecanismo que nos permita identificar as prazas reais que desapareceron do sistema sanitario galego tras da súa amortización”, matiza Abuín, o número superaría até 2015, as 3.500 prazas amortizadas.
| PRAZAS VACANTES 2011/12/13 | PRAZAS VACANTES 2014/15 | Total Prazas Amortizadas | ||
| FEAS | 712 prazas | FEAS | 296 prazas | 1.008 prazas |
| Enfermeiras/os | 414 prazas | Enfermeiras/os | 305 prazas | 719 prazas |
| Matronas | 31 prazas | Matronas | 12 prazas | 43 prazas |
| Fisioterapeutas | 20 prazas | Fisioterapeutas | 10 prazas | 30 prazas |
| Técnicos. Especi | 26 prazas | Técnicos. Especi | 14 prazas | 40 prazas |
| TCAEs | 410 prazas | TCAEs | 261 prazas | 671 prazas. |
| Celadoras/es | 181 prazas | Celadoras/es | 88 prazas | 269 prazas |
| Mantemento | 120 prazas | Mantemento | 35 prazas | 155 prazas |
| Hostalaría | 213 prazas | Hostalaría | 121 prazas | 334 prazas. |
| Administrativo | 170 | Administrativo | 98 prazas | 268 prazas. |
| TOTAL | 2.297 PRAZAS | 1.240 PRAZAS | 3.527 prazas | |
Para a CIG-Saúde, a OPE do Sergas debería conter, ademais das prazas vacantes reais e non cubertas, todas as prazas estruturais ocupadas por persoal eventual con duración superior a un ano. O que permitiría “eliminar a precariedade laboral”.
Neste sentido, Abuín denuncia que a política de persoal que o PP vén aplicando no Sergas tradúcese en “falta de estabilidade laboral e incremento da precariedade”. Tal é así que asegura que hai persoal que está asinando contratos cada 15 días, por días soltos ou outras modalidades que define como “perversas”, para cubrir o mesmo posto. “A isto chámanche estabilidade orzamentaria”, lamenta a secretaria nacional da CIG-Saúde.
A isto engade que con esta modalidade de contratación, “obríganlle ao persoal a facer unha xornada maior que a xornada Sergas” e que “non se lle computa a diminución de xornada en función das noites realizadas”.
