Cofely é a empresa adxudicataria da redacción do proxecto, dirección de obra, mantemento e subministro eléctrico do novo centro de saúde de Marín, alén, curiosamente, doutros 14 novos centros en toda Galiza e a ampliación do Hospital do Salnés.
A construción do centro de saúde, financiadas nun 80% polos fondos do programa Feder Galiza da Unión Europea, cuxo remate estaba previsto para decembro de 2015 podería verse perxudicada pola investigación desta trama corrupta ao poñer en perigo a financiación dos centros de saúde adxudicados a esta empresa.
Desde o Colectivo Nacionalista de Marín entendemos que o modelo de construción e xestión de infraestruturas sanitarias alén de procurar a privatización da sanidade, é un fracaso. Ficando en evidencia, máis aínda, cando este modelo, que pon en perigo o futuro da sanidade galega, está salpicado de tramas de corrupción e tratos de favor a empresas amigas.
Hai uns días, a alcaldesa de Marín, a Sra. Ramallo, xa en precampaña electoral, facía unha declaracións con respecto ao centro de saúde nas que afirmaba que “se seguen a dar pasos firmes que xa non terán volta atrás”. Desde o Colectivo Nacionalista moito nos tememos que este optimismo da alcaldesa vaia ficar en augas de castañas pois, ao se descubrir esta trama, vai haber moitas dificultades para que o centro de saúde se convirta nunha realidade.
O Colectivo Nacionalista de Marín Demanda da Xunta de Galiza explicacións claras sobre o futuro de centro de saúde de Marín e súmase ás peticións de aclaración e investigación de todas as adxudicacións á empresa Cofely.