A CIG-Saúde vén de denunciar publicamente a "caótica situación" na que se atopa o hospital Xeral de Vigo, "onde os recortes chegan a tal extremo que se está a desatender incluso a limpeza e o mantemento do centro". Dende a central nacionalista lembran que a Xerencia ten o compromiso de esixirlle á empresa que cumpra o prego de condicións do contrato, que manteña o hospital en condicións e que poña os materiais necesarios para garantir a limpeza.
A federación de Saúde sostén que a compañía debe de contar co persoal suficiente para garantir o servizo para o que foi contratada, "cousa que non está a facer, e a pesares do cal a Xerencia mira para outro lado".
Dende a central aseguran que non se pode consentir que o Xeral se atope neste estado de abandono "coa escusa da apertura do novo hospital no verán de 2015" e sinalan as numerosas deficiencias que presenta: non conta cun mantemento mínimo, as instalacións atópanse deterioradas, hai cortes eléctricos, o persoal non dispón de roupa para traballar, os vestiarios non están en condicións, hai roturas de paredes e teitos, falta mobiliario... ao que agora hai que sumar as queixas dos traballadores/as pola falta de limpeza".
"Todo isto tamén está a acontecer no Rebullón, outro gran esquecido, xa que o centro estase a caer a cachos e algúns espazos son un perigo para os traballadores/as, comezando polos vestiarios, que non dispoñen do mínimo imprescindíbel", indican.
Finalmente, censuran que á actual dirección do centro vigués non lle importa en que condicións está a traballar o cadro de persoal, se ten ou non os medios suficientes e se se pode garantir unha calidade asistencial mínima a pacientes e usuarios/as.