Desde Isca! entendemos fundamental para toda sociedade coñecer a súa historia e o seu pasado, sendo aí onde se atopan moitas das explicacións do presente. É esencial entender cando se conforma unha sociedade dividida en clases para analizar o nacemento e existencia dunha explotación de clase e combater mellor esas inxustizas. Ser quen de analizar que esa explotación de clase toma, na Galiza, forma de opresión nacional e por iso cobra tanta importancia a loita da clase traballadora galega para rachar os vencellos coloniais, a loita pola independencia e a plena soberanía.

O movemento político e sindical nacionalista comeza a se reorganizar a partir dos anos sesenta e setenta, irrompendo con forza a partir de multitude de conflitos populares. Esa realidade é a que queremos recuperar nun acto público o vindeiro xoves 12 de marzo a partir das 20:00 horas na Asociación Cultural Alexandre Bóveda (rúa Olmos, nº16, 1º. A Coruña) no que se proxectará un pequeno documental editado pola Fundación Moncho Reboiras que leva por título Síntese Histórica do Movemento Obreiro Galego (de sindicalismo e nación galega) e que contará coa posterior intervención de Ramiro Oubiña, membro da Executiva Confederal da CIG.

Anímate e participa!