Um júri nomeado polas Redes Escarlata e composto por José A. Laje, Antom do Vau, Francisco Fernandes Rei, Lourdes Peres, Luz Fandinho, José Luís Santos Cabanas e Maria Martins Clavell com José Luís Mendes Ferrim como secretário decidiu por unanimidade conceder o Prémio Roberto Vidal Bolanho na sua décima ediçom ao blogue “De volta para Loureda” ao se tratar de umha reflexom coletiva sobre “os presos nacionalistas galegos cuja situaçom é contrária às garantias aos que todos os seres humanos tenhem direito”, segundo consta na ata.
Da “Rede de apoio a Carlos Calvo”, o blogue “De volta para Loureda” recolhe artigos e outras colaboraçons de um amplo abano de pessoas arredor da situaçom dos presos políticos galegos nas que se repita a reclamaçom da sua volta para o país. Entre as últimas assinaturas que participárom estám Marcos Seixo, Samu L. Paris, Luz Fandinho, Mª José Bravo, José Manuel Pereiro, Charo Lopes, Antón do Vau ou Héitor Picalho. Publicam-se também os artigos de Carlos Calvo escritos desde a prisom.
As Redes Escarlata criárom o Prémio Roberto Vidal Bolanho há dez anos com o intuito de reconhecer a figura do homem de teatro ao que se lhe dedica este Dia das Letras Galegas, ligando a iniciativa com o “acontecimento histórico da Comuna de Paris, o primeiro governo proletário da história”. Do próprio júri destacam o labor desenvolvido polo próprio Roberto Vidal Bolanho na defesa dos presos políticos galegos e, em especial, contra a política de dispersom.
