O debate organizado polos Comités, força estudantil ligada ao nacionalismo maioritário, vai ajuntar representantes do conjunto de forças nacionais galegas. Bloco Nacionalista Galego, Nós-Unidade Popular, Causa Galiza, Compromisso pola Galiza, Anova e Convergência XXI  debaterám na capital sobre a necessidade de soberania do povo galego. O ato, que terá lugar na Faculdade de Ciências Políticas, visa contribuir para a criaçom de um foro aberto entre o conjunto de forças políticas galegas sobre o direito de autodeterminaçom e o nascimento da I República Galega.

Segundo os Comités, cada representante terá 5 minutos para expor os seus posicionamentos arredor de diversas questons que serám trazidas à tona pola moderadora. Depois iniciará-se um debate com o público. O objetivo da palestra, segundo informam as pessoas organizadoras, é debater sobre "como construir esse Estado próprio" que a Galiza precisa para sair da crise capitalista. "Qual é o modelo social, político e económico que defendem cada umha destas organizaçons políticas" tam heterogéneas será outro dos pontos que serám debatidos amanhá. 

Aliás, a organizaçom estudantil sublinha que embora o público alvo seja o estudantado, a importáncia e complexidade do debate deveria contribir para a presença de um público mais abrangente.

Por seu turno, quem nom puder assistir fisicamente poderá acompanhar o debate através do twitter do digital Sermos Galiza e o hastag #SoberaniaGZ.