A manifestación convócase baixo a lenda Malia a represión, malia a precariedade, a nosa forza é imparábel, e tenta ser unha resposta popular, ampla e unitaria ante os últimos ataques por parte da Policia e a Administración de Xustiza contra os dereitos de expresión, reunión, manifestación, liberdade sindical e folga.

Despois das últimas detencións e rexistros domiciliarios, e ante os sumarios abertos por feitos acontecidos durante as dúas últimas folgas xerais e que afectan a case corenta persoas, desde a CNT e a CUT percebemos a necesidade de articular unha resposta ao que semella ser unha forma de conculcar, mediante a acción policial, o conxunto dos dereitos políticos e sindicais que a clase traballadora gañou con moito esforzo, e tamén ás veces con sangue, e que hoxe están en evidente perigo de desaparecer. Entendemos que, ante a desproporción e a discrecionalidade da actuación policial e xudicial, é necesaria unha acción conxunta e solidaria entre o conxunto do tecido asociativo de Compostela, do movemento obreiro e das centrais sindicias. Entendemos que estamos a vivir unha situación política e económica que non ten volta atrás, que conscientes do carácter corrupto e das prácticas explotadoras e precarizadoras da clase empresarial e política, cada vez máis milleiros de persoas fan da rúa o seu espazo desde o que articular estratexias de modificación consciente da sociedade capitalista nunha sociedade libre, xusta, de iguais.

Entendemos que é a actual unha fase decisiva da mobilización de base, que é hoxe o día que a clase traballadora nos xogamos a nosa propia existencia e que, ante os intentos de inocular o medo e a desmobiliazación por parte do Capital, é necesaria unha resposta frontal, ampla, que integre ao conxunto da poboación que padecerá estes ataques, que demostre que a nosa voz está presente na rúa e nos centros de traballos cun único horizonte: a transformación integral desta sociedade, transformación que xa está en marcha e que é, pese a quen pese, imparábel.