O evento comezará o venres en Teo e rematará o domingo pola mañá cunha manifestación fronte ao Parlamento de Galicia en defensa dos dereitos das labregas
Como acontece cada ano, ao redor dun cento de afiliadas do Sindicato Labrego Galego reuniranse no Encontro Anual que realiza a Secretaría das Mulleres desta organización agraria. Desta vez, o lugar elixido foi a Casa Común de Oza, no concello de Teo, e os debates e obradoiros que se van desenvolver, entre o 26 e o 28 de outubro virarán ao redor de temas como a crise ou a Lei do Aborto.
Deste xeito, o venres haberá un primeiro relatorio titulado “Que supoñen para a cidadanía e para as mulleres a débeda e o rescate financeiro?” que será impartido por Lupe Ces, da Marcha Mundial das Mulleres. Xa o sábado, as charlas serán sobre o impacto na cidadanía e nas mulleres das políticas de recortes no ensino, en sanidade e nos servizos sociais; e sobre a Lei do Aborto, coa participación da avogada Celia Balboa.
Ademais, o encontro completarase con obradoiros de traballo e saídas ao mercado de Teo e á zona histórica de Compostela.
Este encontro anual culminará o domingo, día no que as asistentes elixirán á nova responsable da Secretaría das Mulleres do SLG, e se realizará unha manifestación diante do Parlamento de Galicia en defensa dos dereitos das labregas.
De seguido, achegamos o programa do encontro:
IX Encontro anual da Secretaría das Mulleres - Teo. 26, 27 e 28 de outubro.
Sexta feira, 26 de outubro:
18,00 H.- Chegada.
18,30 H.- Benvida e presentación do programa
19,00 H.- Relatorio: Que supoñen para a cidadanía e para as mulleres a débeda e o rescate financieiro?
21,00 H.- Cea, cos productos caseiros que cada unha aporte.
Acto benvida das participantes / Intercambio de sementes.
Sábado, 27 de outubro:
9,00 H.- Os comezos do mercado de Teo.
10,00 H.- Visita ó mercado de Teo
11,15 H.- Benvida institucional do concello de Teo.
11:30 H.- Relatorio: Impacto na cidadanía e na vida das mulleres da política de recortes no ensino, na sanidade nos servios sociais.
12,30 H.- Dinámica de traballo.
13,30 H.- Comida
15,30 H.- Lei do Aborto: qué supón a actual lei e as consecuencias das posibles modificacións.
16,30 H.- Dinámicas / Talleres.
19,00 H.- Saída de Teo
20,00 H.- Visita dunha zona histórica en Santiago de Compostela
22:00 H - Cea
Domingo, 28 de outubro
9,30 H.- Traballo interno da Secretaría das Mulleres: balance e próximas campañas.
10,30 H.- Elección da responsable da Secretaría das Mulleres.
11,15 H.- Saída cara a mobilización.
12,30 H.- Mobilización en defensa de todos os nosos dereitos.
13,30 H.- Comida e despedida
