Na sua intervençom no centro social Gomes Gaioso da Corunha, Eliseu Fernandes falou dos anos da juventude do Foucelhas, a sua tomada de consciência política e de classe, num contexto em que os setores populares, e em especial a classe trabalhadora, eram mais conscientes do que nunca da sua situaçom.

Eliseu Fernandes também pujo em causa lugares comuns sobre Foucelhas como a sua pretensa indisciplina; como dado que refutaria esse traço que tam comumente se lhe atribui citou o facto de que o Foucelhas se deslocou à zona de Ponte Vedra quando assim lho ordenou o Exército Guerrilheiro da Galiza. Também afirmou que a direçom do Exército Guerrilheiro dera no seu momento ordem de o eliminar, mas que a ordem nom se chegou a executar porque o encarregado de fazer efetiva a execuçom caiu num confronto com a Guarda Civil. Aliás, trouxérom-se outros dados, como a possível filiaçom do Benigno Andrade à Izquierda Republicana; umha hipótese que toma forma a partir da apariçom de umha ata desta formaçom política em que figura um Benigno Andrade, e que algumhas vozes afirmam tratar-se do Foucelhas.

No turno de palavras surgírom intervençons que achegárom anedotário próprio da legenda popular que se forjou em torno da sua figura, assim como reflexons sobre o mito e as sombras e confusons que há à sua volta.