O Organismo Popular Anti-repressivo CEIVAR foi convidado a participar na Jornada Solidária Internacionalista "Galiza em luita. Terrorismo ou resistência?", organizada por companheiras galegas que moram em Madrid. O lugar escolhido para a jornada é o CSOA La Casika, na cidade de Móstoles.
A jornada que decorrerá no dia 20 de dezembro será intensa e prolongara-se durante todo o dia a partir das doze do meio-dia. Jogos galegos, jantar popular, projecçom de vídeo, palestra, magusto e concerto tratarám de achegar umha mostra da nossa identidade nacional e de fazer umha aproximaçom às luitas na Galiza e às suas conseqüências repressivas. É neste último ámbito no que CEIVAR participará através dumha palestra sobre os processos repressivos na Galiza, assim como na apresentaçom do livro escrito por ex-presas/os independentistas "O teito é de pedra".
Desde o Organismo Popular Anti-repressivo CEIVAR congratulamo-nos por este tipo de iniciativas que partem de galegas e galegos no exterior, pessoas conscientes e solidárias que
contam com a colaboraçom internacionalista da comunidade popular onde estám a residir. Animamos a que o exemplo se espalhe por diferentes latitudes e ámbitos como jeito de aproximar a digna luita da Galiza e do seu Povo.
