As rúas de Vigo acolleron a última hora da tarde de onte unha concorrida manifestación en defensa da Asociación Galega San Francisco (Agasfra), entidade sen ánimo de lucro dedicada á atención a persoas con discapacidade intelectual, cuxa supervivencia depende da decisión da Xunta de privatizar o servizo. Os traballadores/as denuncian que a decisión suporá a desaparición de máis de 20 empregos.

A marcha, na que participaron usuarios/as, familiares, amigos/as e traballadores/as do centro con sede en Coia, partiu de Vía Norte ás 20.00 horas e rematou na Porta do Sol, onde se deu lectura a distintos comunicados.

Os afectados/as e as súas familias reivindicaron que a súa opinión sexa tomada en conta durante o proceso para poder escoller centro, xa que tras a concesión terían que desprazarse até o concello de Mos.

Pola súa banda, os traballadores/as de Agasfra denunciaron que a decisión da Consellería de Traballo de privatizar o servizo suporá a desaparición de máis de 20 empregos, tendo en conta que a subrogación de persoal non figura no prego de condicións do concurso.

Precisamente, a federación de Ensino da CIG -cuxo secretario nacional, Anxo Luzao, estivo presente na mobilización xunto ao secretario comarcal da CIG de Vigo, Serafín Otero-, fixo entrega días atrás na Consellería de máis de 1500 sinaturas esixindo o mantemento do emprego no centro vigués e denunciando as políticas de privatización dos servizos públicos.