O desprazamento de solidarios e solidarias galegas ata as prisións españolas nas que hai presos galegos celebrarase na fin de semana do 18 e o 19 de xaneiro. A intención da organización é mobilizar dúas columnas solidarias, unha desde o sur do país e outra desde o norte. A primeira terá como base as cidades de Pontevedra, Vigo e Ourense e o resto de comarcas meridionais, e desprazarase ata as prisións madrileñas de Aranxuez e Estremera, onde se atopan respectivamente Antón e Teto. A columna do norte recollerá solidarios e solidarias de Compostela, Coruña, Ferrol, Lugo e demais comarcas ao norte do Ulla, para achegar a solidariedade galega a Senlheiro en Villabona e a Edu e Xurxo en Mansilla de las Mulas. Ambas expedicións confluirán na cadea leonesa.
A organización trazou os itinerarios máis óptimos para atender o maior número posible de presos. Ante a imposibilidade de atender a todas as prisións tivemos que descartar a viaxe ata Topas, pero para máis adiante celebraremos unha marcha específica para trasladar o noso cariño e solidariedade a Carlos.
Nos próximos dias Que voltem para a casa! informará con máis detalle da organización da viaxe e os lugares nos que os solidarios e solidarias galegas poden anotarse. A organización contratará os autobuses necesarios e solicitará colaboración económica para poder sufragalos.