Están chamados a declarar este mércores na Audiencia Nacional baixo a acusación de "enaltecemento do terrorismo".
A CIG traslada a solidariedade e o apoio aos catro militantes do independentismo galego que o mércores 4 de setembro están chamados a declarar coma imputados na Audiencia Nacional baixo a acusación de "enaltecemento de terrorismo". A central sindical considera un ataque á liberdade de expresión e un atentado contra o dereito de manifestación que se pretenda xulgar a catro cidadáns galegos por portar fotos de presos independentistas no marco dunha mobilización social.
Cómpre subliñar que estas persoas foron requiridas pola Policía española para se identificar polo simple feito de levar imaxes de presos independentistas galegos (contra os que non existe sentenza condenatoria), sen que en ningún momento provocasen altercado ou suceso algún durante o desenvolvemento da manifestación contra a megaminería que tivo lugar en Compostela o pasado 2 de xuño.
Este tipo de prácticas antidemocráticas afondan na persecución ideolóxica que o Goberno español (valéndose dun tribunal de excepción herdeiro do Tribunal de Orden Pública da ditadura franquista) vén realizando contra persoas e organizacións que defenden o lexítimo dereito de soberanía das distintas nacións dentro do Estado español.