A açom foi aprovada no seu dia pola Assembleia de Desempregados e Desempregadas da CIG, entidade sindical que convocou hoje umha concentraçom solidária com os cinco companheiros e a companheira acusada de umha falta de "furto".

Representantes da empresa expropriada comparecêrom no tribunal para se ratificarem na acusaçom contra os filiados e a filiada da CIG, que por seu turno mantivérom a legitimidade da açom no quadro de crise generalizada, de aumento de desemprego e de necessidades económicas fundamentais nom atendidas polo sistema.

O procurador mantivo a sua acusaçom, ficando o caso visto para sentença, que poderá ir, caso haja condena, de umha multa económica a um arresto domiciliário.

Às portas do prédio dos julgados, dúzias de trabalhadores, trabalhadoras e pessoas em condiçom de desemprego solidarizárom-se com os integrantes e a integrante da Assembleia de Desempregados/as da CIG, coreando palavras de ordem como "O capitalismo é o terrorismo".

Foi numerosa a assistência de meios de comunicaçom, incluído o canal espanhol La Sexta, que desistiu de entrevistar um dos desempregados julgados, devido à exigência deste de que a entrevista se realizasse em galego. A Assembleia de Desempregados e desempregadas fijo questom de lembrar que a expropriaçom promovida pola Assembleia foi prévia às que se venhem protagonizando por iniciativa do SAT andaluz, se bem coincidiu em apoiar toda açom da mesma natureza que poda realizar-se em qualquer ponto da Galiza e do mundo.

Porta-vozes da CIG em Ferrol anunciárom novos julgamentos nas próximas semanas, como parte de processos repressivos resultantes dos conflitos laborais que se estendem um pouco por toda a comarca.

Foto: Diário Liberdade.