Num comunicado recebido polo Diário Liberdade, as organizaçons convocantes daquele ato asseguram que foi "completamente pacífico" no qual "as moças e moços fôrom colocando bandeiras galegas ao som da música". A celebraçom da jornada reivindicativa nem sequer tivo impacto de cortar o tránsito em nengumha rua, assinalam.
Apesar disso, desde 15 de Agosto dúzias de participantes neste ato estám a receber sançons administrativas de 400 € da Subdelegaçom do Governo espanhol, no que as e os convocantes daquele ato entendem "umha perseguiçom política à mocidade nacionalista por parte de um governo -o do Partido Popular- que caminha sem complexos face ao fascismo cru e nu".
Amanhá no parque de Sám Lázaro, precisamente ao pé da Subdelegaçom do Governo espanhol que está a reprimir a expressom pacífica dos anseios de liberdade da Galiza, as entidades convocantes vam realizar umha conferência de imprensa com o objetivo de explicar os pormenores desses factos, e também para "denunciar o caráter político dessa medida repressiva" e anunciar as açons de "resposta" que empreenderám.
Foto do Diário Liberdade - Também em Compostela, a polícia nom duvidou em intimidar as manifestaçons no Dia da Pátria. Nesta imagem, vemos como encurralárom completamente a convocada por Briga -com todas as permissons e gestons legais necessárias.
